കോട്ടയം: പാമ്പാടി നെടുകോട്ടുമലയില്‍ തെരുവ് നായ ആക്രമണം. അഞ്ച് പേര്‍ക്ക് തെരുവുനായയുടെ കടിയേറ്റു. കുറ്റിക്കല്‍ സ്വദേശികളായ അനീഷ് കുര്യാക്കോസ്, ജോബി അമ്പാട്ട്, കെ എസ് ചാക്കോ, വി എസ് മോഹനന്‍, ജോസഫ് കുര്യന്‍ എന്നിവര്‍ക്കാണ് പരുക്കേറ്റത്. ഇതില്‍ മൂന്ന് പേരുടെ പരുക്ക് ഗുരുതരമാണ്. നായയെ പിന്നീട് ചത്ത നിലയില്‍ കണ്ടെത്തി. നായക്ക് പേ വിഷബാധയുണ്ടെന്നാണ് കരുതുന്നത്.
ഇന്ന് ഉച്ചക്ക് രണ്ടിനും നാലിനുമിടയിലാണ് പ്രദേശത്തെ ഭീതിയിലാഴ്ത്തി നായ പരാക്രമം നടത്തിയത്. മുളയംക്കുന്ന്, കന്നുവെട്ടി, കുറ്റിക്കല്‍ പ്രദേശങ്ങളിലുള്ളവര്‍ക്കാണ് കടിയേറ്റത്. കുറ്റിക്കല്‍ സെന്റ് തോമസ് ഹൈസ്‌കൂളിന് സമീപം ചാത്തന്‍പുരയിടത്ത് അനീഷ് കുര്യാക്കോസിനാണ് നായയുടെ കടിയേറ്റതായി ആദ്യം വിവരം പുറത്തുവന്നത്. കാലില്‍ കടിയേറ്റതോടെ വീണുപോയ അനീഷിന്റെ മുഖത്തും കൈക്കും കടിച്ച് മുറിവേല്‍പ്പിച്ചു. തുടര്‍ന്ന് റബ്ബര്‍ തോട്ടത്തില്‍ നില്‍ക്കുകയായിരുന്ന ജോബിയുടെ കാലിനും നായ കടിച്ചു. ഓട്ടത്തിനിടയില്‍ വീണതോടെ ചുണ്ടിനും മുഖത്തും കൈക്കും കടിച്ച് മാരകമായി മുറിവേല്‍പ്പിച്ചു.
ചക്കോ, ജോസഫ് കുര്യന്‍, മോഹനന്‍ എന്നിവരെയും ആക്രമിച്ചു. മോഹനന്റെ ദേഹത്ത് ചാടിക്കയറിയായിരുന്നു കടിച്ചത്. ചാത്തന്‍പുരയിടത്ത് തോമസ് കുര്യാക്കോസിന്റെയും വെള്ളറയില്‍ മോഹനന്റെയും വീട്ടിലെ കോഴികളെ നായ കടിച്ചുകൊന്നു.
ഗുരുതരമായ പരുക്കേറ്റ അനീഷും ജോബിയും ചാക്കോയും പാമ്പാടി താലൂക്ക് ആശുപത്രിയിലെ പ്രാഥമിക ചികിത്സക്ക് ശേഷം കോട്ടയം മെഡിക്കല്‍ കോളജ് ആശുപത്രിയില്‍ ചികിത്സ തേടി. സ്‌കൂള്‍ വിടുന്നതിനോടടുത്ത സമയത്തായിരുന്നു നായയുടെ ആക്രമണം. നായ ആക്രമണം ഭയന്ന് വിദ്യാലയങ്ങളില്‍ രക്ഷിതാക്കള്‍ നേരിട്ടെത്തിയാണ് കുട്ടികളെ കൊണ്ടുപോയത്.
SUMMARY: Stray dog ??attacks in Kottayam; Five people bitten, three seriously injured
WhatsApp
Telegram
