ബെംഗളൂരുവിൽ പച്ചക്കറി വിലയിൽ വർധന

ബെംഗളൂരു: ബെംഗളൂരുവിൽ പച്ചക്കറി വിലയിൽ വൻ വർധന. കാലാവസ്ഥ കാരണം വിപണിയിൽ ലഭ്യത കുറവായതിനാലാണ് വിലയിൽ വർധനയെന്ന് പച്ചക്കറി വ്യാപാരികൾ പറഞ്ഞു. കഴിഞ്ഞ രണ്ടോ മൂന്നോ ആഴ്ചകൾക്കുള്ളിൽ നിത്യോപയോഗ പച്ചക്കറികളുടെ വില ഇരട്ടിയായിട്ടുണ്ട്. ചില്ലറ വിപണികളിൽ കാരറ്റ്, കാപ്സിക്കം, വെള്ളരി, മറ്റ് പച്ചക്കറികൾ എന്നിവയുടെ വില ഉയർന്നിട്ടുണ്ട്. ബീൻസിന്റെ വിലയും വർധിച്ചു. മൊത്ത വിപണികളിൽ കിലോയ്ക്ക് 80 മുതൽ 90 രൂപ വരെയും ചില്ലറ വിപണികളിൽ 110 മുതൽ 125 രൂപ വരെയും ബീൻസിന് വില ഉയർന്നിട്ടുണ്ട്.

വേനൽക്കാലമായതിനാലും ജലലഭ്യത പതിവിലും കുറവായതിനാലും വിപണികളിൽ പച്ചക്കറി വരവ് കുറഞ്ഞു. മറ്റ് പച്ചക്കറികളെ അപേക്ഷിച്ച് പയറുകളുടെ സ്റ്റോക്ക് കുറവാണെന്ന് വ്യാപാരികൾ പറഞ്ഞു. സാധാരണ വേനൽക്കാല വിളകളല്ലാത്ത ചില പച്ചക്കറികളുടെ വിലയിലും കുത്തനെ വർധനയുണ്ടായി. ചില്ലറ വിപണികളിലും ഹോപ്കോമുകളിലും കക്കിരിക്കയുടെ വില കിലോയ്ക്ക് 40 മുതൽ 45 രൂപ വരെയും ചൗ ചൗ കിലോയ്ക്ക് 50 മുതൽ 60 രൂപ വരെയും ഉയർന്നിട്ടുണ്ട്. കാരറ്റ് കിലോയ്ക്ക് 60 മുതൽ 65 വരെയും, കാപ്സിക്കം 40 മുതൽ 50 വരെയും, വഴുതനങ്ങ 40 മുതൽ 45 വരെയും, വെണ്ടയ്ക്ക 35 മുതൽ 40 വരെയും, ഉരുളക്കിഴങ്ങ് 38 മുതൽ 40 വരെയും, നോൾ ഖോൾ കിലോയ്ക്ക് 80 മുതൽ 90 വരെയും ചില്ലറ വിൽപ്പനയിലും ഓൺലൈൻ വിപണികളിലും വിൽക്കുന്നുണ്ട്.

TAGS: BENGALURU | PRICE HIKE
SUMMARY: Vegetables price in bengaluru rises