ബെംഗളൂരു: സംസ്ഥാനത്ത് സർക്കാർ ഉദ്യോഗസ്ഥരുടെ വീടുകളിലും, ഓഫിസുകളിലുമായി ലോകായുക്ത റെയ്ഡ്. കോലാര്, തുമകുരു, ബെംഗളൂരു, മാണ്ഡ്യ തുടങ്ങിയ ജില്ലകളിലാണ് റെയ്ഡ്. അഴിമതി കേസുമായി ബന്ധപ്പെട്ടാണ് ലോകായുക്ത ഇടപെടല്. 25ഓളം സ്ഥലങ്ങളിൽ റെയ്ഡ് നടത്തുകയും രേഖകൾ പരിശോധിക്കുകയും ചെയ്തിട്ടുണ്ട്.
ചിക്കബല്ലാപുരിൽ മൈൻസ് ആൻഡ് ജിയോളജി വകുപ്പിലെ സീനിയർ ജിയോളജിസ്റ്റ് കൃഷ്ണവേണി എം.സി.ക്കും കാവേരി നീരവൈ നിഗമയുടെ മാനേജിങ് ഡയറക്ടർ മഹേഷിനുമെതിരെ ലോകായുക്തയില് രജിസ്റ്റർ ചെയ്ത നാല് അഴിമതി കേസുകളുമായി ബന്ധപ്പെട്ടാണ് നടപടി.
അഴിമതി, കൃത്യ നിർവഹണത്തിലെ പിഴവ്, പൊതുപ്രവർത്തകരുമായി ബന്ധപ്പെട്ട മറ്റ് പരാതികൾ എന്നിവയാണ് ഇവര്ക്കെതിരെ രജിസ്റ്റര് ചെയ്തിട്ടുള്ളത്. ബെംഗളൂരു അർബനിലെ ആറ് ഉദ്യോഗസ്ഥരുടെയും ബെംഗളൂരു റൂറലിലെ രണ്ട് ഉദ്യോഗസ്ഥരുടെയും ശിവമോഗയിലെ രണ്ട് ഉദ്യോഗസ്ഥരുടെയും യാദ്ഗിർ, തുമകുരു എന്നിവിടങ്ങളിലെ ഓരോ ഉദ്യോഗസ്ഥരുടെയും വീടുകളിലും ലോകായുക്ത റെയ്ഡ് നടത്തി.
ബനശങ്കരി വിശ്വേശ്വരയ്യ റോഡിലെ ടൗൺ പ്ലാനിങ് ഡയറക്ടർ തിപ്പേസ്വാമിയുടെ വീട്ടിൽ നടത്തിയ റെയ്ഡിൽ വിലപിടിപ്പുള്ള രേഖകളും സ്വർണാഭരണങ്ങളും പിടിച്ചെടുത്തു.
23 ലധികം സ്വർണ്ണ ചെയിനുകളും, 28 ജോഡി കമ്മലുകളും, മുത്തുമാലയും കണ്ടെത്തി. ഇതിനുപുറമെ രത്നങ്ങൾ, കോടിക്കണക്കിനു രൂപയുടെ സ്വർണമോതിരങ്ങൾ, എട്ടുലക്ഷം രൂപ, വിലകൂടിയ എട്ടിലധികം ബ്രാൻഡഡ് വാച്ചുകൾ എന്നിവയും കണ്ടെടുത്തു.
വ്യവസായ വാണിജ്യ വകുപ്പ് അഡിഷണൽ ഡയറക്ടർ സി.ടി. മുദ്ദു കുമാർ, യോജന പ്രോജക്ട് ഡയറക്ടർ നിർദർശകരു ബാലവന്ത്, സീനിയർ വെറ്ററിനറി ഓഫിസർ ആർ സിദ്ധപ്പ, ഹെബ്ബഗോടി മുനിസിപ്പൽ കമ്മിഷണർ സിഎംസി കെ. നരസിംഹമൂർത്തി, വാണിജ്യനികുതി ജോയിന്റ് കമ്മിഷണർ രമേഷ് കുമാർ, മറ്റ് ഉദ്യോഗസ്ഥർ എന്നിവരുടെ നേതൃത്വത്തിലാണ് റെയ്ഡ് നടത്തിയത്.
TAGS: KARNATAKA | LOKAYUKTA
SUMMARY: Lokayukta conducts raid at govt officials offices and residence
WhatsApp
Telegram
