ഹൈക്കോടതി ഹാളിൽ മധ്യവയസ്കൻ ആത്മഹത്യക്ക് ശ്രമിച്ചു

ബെംഗളൂരു: കർണാടക ഹൈക്കോടതിയുടെ ഹാളിൽ മധ്യവയസ്കൻ ആത്മഹത്യക്ക് ശ്രമിച്ചു. മൈസൂരു സ്വദേശി ശ്രീനിവാസ് ചിന്നം (54) ആണ് ജീവനൊടുക്കാൻ ശ്രമിച്ചത്.

ഹാളിൽ വെച്ച് ഇയാൾ സ്വയം കഴുത്തുമുറിക്കുകയായിരുന്നു. മുറിവേറ്റ ഇയാളെ സുരക്ഷാ ചുമലതയിലുണ്ടായിരുന്ന പോലീസുകാർ സമീപത്തെ ആശുപത്രിയിലെത്തിച്ചു. ചീഫ് ജസ്റ്റിസ് അഞ്ജാരിയയുടെ കോടതി ഹാളിലായിരുന്നു സംഭവം.

കോടതി പ്രവർത്തിച്ചുകൊണ്ടിരിക്കെ ഇയാൾ ഹാളിലേക്ക് കയറിവരുകയും കൈയിലുണ്ടായിരുന്ന ഫയൽ സുരക്ഷാ ഉദ്യോഗസ്ഥരുടെ പക്കൽ നൽകുകയും ചെയ്തു. തുടർന്ന് കൈയിൽ കരുതിയ കത്തികൊണ്ട് കഴുത്തുമുറിക്കാൻ ശ്രമം നടത്തുകയായിരുന്നു. ആത്മഹത്യ ശ്രമത്തിന് പിന്നിലെ കാരണം വ്യക്തമായിട്ടില്ല. ആത്മഹത്യകുറിപ്പൊന്നും കണ്ടെടുത്തിട്ടില്ലെന്നും പോലീസ് അറിയിച്ചു.

ഇയാൾ ചികത്സയിലാണെന്നും അപകടാവസ്ഥ തരണം ചെയ്തതായും പോലീസ് പറഞ്ഞു. 93 ലക്ഷം രൂപയുടെ അപ്പാർട്ട്മെന്റ് പ്രോജക്ടിൽ പങ്കാളിത്തം തരാമെന്ന് കാട്ടി നിരവധി ആളുകളിൽ നിന്ന് തട്ടിപ്പ് നടത്തിയ കേസിൽ പ്രതി ചേർക്കപ്പെട്ടയാളാണ് ശ്രീനിവാസ്. സംഭവത്തിൽ പോലീസ് കേസെടുത്തു.

The post ഹൈക്കോടതി ഹാളിൽ മധ്യവയസ്കൻ ആത്മഹത്യക്ക് ശ്രമിച്ചു appeared first on News Bengaluru.