ബെംഗളൂരു: ബെംഗളൂരുവിൽ ജലക്ഷാമം രൂക്ഷമായ സാഹചര്യത്തിൽ ശുദ്ധീകരിച്ച മലിനജലം വിതരണം ചെയ്യാനായി പ്രത്യേക പൈപ്പ്ലൈൻ തയ്യാറാക്കുമെന്ന് ബെംഗളൂരു വാട്ടർ സപ്ലൈ ആൻ്റ് സ്വിവറേജ് ബോർഡ് (ബിഡബ്യുഎസ്എസ്ബി). ജലക്ഷാമത്തെ തുടർന്ന് നഗരത്തിലെ വ്യവസായശാലകളടക്കം സ്തംഭിച്ചതോടെയാണ് ശുദ്ധീകരിച്ച വെള്ളം എത്തിക്കാൻ ബിഡബ്യുഎസ്എസ്ബിയുടെ നേതൃത്വത്തിൽ വിപുലമായ പദ്ധതി ഒരുങ്ങുന്നത്.
കുടിക്കാൻ യോഗ്യമല്ലാത്ത വെള്ളം ഉപയോഗിച്ചു മറ്റു പ്രവൃത്തികളെല്ലാം നടത്താനാകുമെന്ന് ബിഡബ്ല്യൂഎസ്എസ്ബി പറഞ്ഞു. ശുദ്ധീകരിച്ച വെള്ളം പൈപ്പ്ലൈൻ മുഖേന കെട്ടിടങ്ങളിലേക്ക് എത്തിക്കാനാണ് ബിഡബ്യുഎസ്എസ്ബി പദ്ധതിയിടുന്നത്. ഇത്തരത്തിലുള്ള രാജ്യത്തെ ആദ്യ പദ്ധതിയാകും ഇത്. വ്യവസായികളുടെയും മറ്റ് അസോസിയേഷനുകളുടെയും യോഗത്തിൽ ബിഡബ്യുഎസ്എസ്ബി ചെയർമാൻ വി. രാം പ്രസാദ് മനോഹർ ആണ് ഇക്കാര്യം അറിയിച്ചത്.
പദ്ധതിയുടെ ആദ്യഘട്ടം പീനിയയിലെ ഇൻഡസ്ട്രിയൽ ഏരിയയിലാണ് നടപ്പാക്കുക. 1480 എംഎൽഡി മലിനജലമാണ് ബെംഗളൂരുവിൽ നിന്ന് പുറന്തള്ളുന്നത്. നിലവിൽ 1,212 എംഎൽഡി വെള്ളം ശുദ്ധീകരിക്കാനാണ് ബോർഡ് പദ്ധതിയിടുന്നത്. പദ്ധതി നടപ്പാക്കുന്നത് വഴി കുടിവെള്ളമായ കാവേരി നദീജലം മറ്റ് ആവശ്യങ്ങൾക്കായി ഉപയോഗിക്കുന്നത് പൂർണമായും ഒഴിവാക്കാനാണ് ബിഡബ്യുഎസ്എസ്ബി ലക്ഷ്യമിടുന്നതെന്ന് മനോഹർ വിശദീകരിച്ചു.
The post രാജ്യത്ത് ഇതാദ്യം; ശുദ്ധീകരിച്ച മലിനജല വിതരണത്തിന് പ്രത്യേക പൈപ്പ്ലൈൻ തയ്യ്യാറാക്കും appeared first on News Bengaluru.
Powered by WPeMatico
