ബെംഗളൂരു: മൈസൂരു -ബെംഗളൂരു ദേശീയപാതയുടെ പ്രവേശന പോയിന്റായ കെമ്പഗൗഡ സർക്കിളിൽ (മണിപ്പാൽ ഹോസ്പിറ്റൽ ജങ്ഷൻ) ഫ്ലൈഓവർ നിർമാണം ഉടൻ ആരംഭിക്കുമെന്ന് നാഷനൽ ഹൈവേ അതോറിറ്റി ഓഫ് ഇന്ത്യ അറിയിച്ചു. ധാരിവാൾ ബിൽഡ്‌ടെക് ലിമിറ്റഡിന് കരാർ നൽകിയെന്നും നിർമാണം തുടങ്ങുന്നതിനുള്ള തയാറെടുപ്പുകൾ പൂർത്തിയാക്കി ഉടൻതന്നെ പണി ആരംഭിക്കുമെന്ന് പ്രതീക്ഷിക്കുന്നതായും അധികൃതര്‍ പറഞ്ഞു.
നിര്‍മാണം പൂര്‍ത്തിയാകുന്നതോടെ മൈസൂരു-ബെംഗളൂരു ഹൈവേയില്‍നിന്ന് മൈസൂരു നഗരത്തിലേക്കും, മൈസൂര്‍ റിങ് റോഡിലേക്കും പ്രവേശിക്കുമ്പോഴും തിരിച്ചുവരുമ്പോഴുമുള്ള ഗതാഗതക്കുരുക്ക് കുറയും. നിലവില്‍ ഇവിടെ അപകടവും പതിവാണ്. ബെംഗളൂരു ദേശീയപാത, ഹുൻസൂർറോഡ്, ബന്നൂർ, ടി. നരസിപൂര എന്നീ നാല് ദിശകളിൽനിന്നുള്ള വാഹനങ്ങൾ ഇവിടെ ഒത്തുചേരുന്നുണ്ട്.
മൈസൂരുവിലെ ജനങ്ങളുടെ ദീർഘകാല ആവശ്യം ഇതോടെ യാഥാർഥ്യമാകുകയാണെന്ന് മൈസൂർ-കുടക് എം.പി യദുവീർ കൃഷ്ണദത്ത ചാമരാജ വൊഡയാര്‍ പറഞ്ഞു. മണിപ്പാൽ ആശുപത്രി ജങ്ഷനിൽ ഫ്ലൈഓവർ വേണമെന്ന ജനങ്ങളുടെ നിരന്തരമായ ആവശ്യം മുന്‍നിര്‍ത്തി എന്‍.എച്ച്.എ.ഐ ഉദ്യോഗസ്ഥരുമായി നിരവധി തവണ കൂടിക്കാഴ്ചകൾ നടത്തുകയും പദ്ധതി നടപ്പാക്കുന്നതിനായി സമ്മർദം ചെലുത്തുകയും ചെയ്തിരുന്നുവെന്ന് അദ്ദേഹം പറഞ്ഞു.
SUMMARY: Traffic congestion on Mysore-Bengaluru highway will be reduced; Construction of flyover at Kempegowda Circle soon
