കൊച്ചി: ശബരിമല സ്വർണ്ണക്കൊള്ളക്കേസില്‍ എൻഫോഴ്‌സ്‌മെന്റ് ഡയറക്ടറേറ്റ് അന്വേഷണം ഊർജിതമാക്കി. കേസിലെ പ്രധാന പ്രതിയും തിരുവിതാംകൂർ ദേവസ്വം ബോർഡ് മുൻ അഡ്മിനിസ്‌ട്രേറ്റീവ് ഓഫീസറുമായ മുരാരി ബാബു ചോദ്യം ചെയ്യലിനായി കൊച്ചിയിലെ ഇ.ഡി ഓഫീസില്‍ ഹാജരായി.
ശ്രീകോവിലിലെ ദ്വാരപാലക വിഗ്രഹങ്ങളുടെ കട്ടിളപ്പാളി സ്വർണ്ണം പൂശിയതിലെ തട്ടിപ്പുമായി ബന്ധപ്പെട്ടാണ് ഇദ്ദേഹത്തെ ചോദ്യം ചെയ്യുന്നത്. കേസ് ഇ.ഡി ഏറ്റെടുത്ത ശേഷം ചോദ്യം ചെയ്യപ്പെടുന്ന ആദ്യ വ്യക്തിയാണ് മുരാരി ബാബു. നേരത്തെ പ്രത്യേക അന്വേഷണ സംഘം (SIT) രജിസ്റ്റർ ചെയ്ത കേസുകളില്‍ 90 ദിവസം കഴിഞ്ഞിട്ടും കുറ്റപത്രം സമർപ്പിക്കാത്തതിനെത്തുടർന്ന് മുരാരി ബാബുവിന് സ്വാഭാവിക ജാമ്യം ലഭിച്ചിരുന്നു.
പ്രതികളില്‍ നിന്ന് പിടിച്ചെടുത്ത രേഖകളുടെ അടിസ്ഥാനത്തിലാണ് ഇ.ഡി അന്വേഷണം മുന്നോട്ട് കൊണ്ടുപോകുന്നത്. നേരത്തെ 21 കേന്ദ്രങ്ങളില്‍ നടത്തിയ പരിശോധനയില്‍ സ്വർണ്ണമടക്കം ഇ.ഡി കണ്ടെത്തിയിരുന്നു. നിലവില്‍ 12 പേർക്കാണ് ഹാജരാകാൻ നോട്ടീസ് നല്‍കിയിരിക്കുന്നത്.
അതേസമയം, ഹൃദയസംബന്ധമായ അസ്വസ്ഥതകളെത്തുടർന്ന് മെഡിക്കല്‍ കോളേജ് ആശുപത്രിയില്‍ ചികിത്സയിലായിരുന്ന ശബരിമല തന്ത്രി കണ്ഠര് രാജീവരെ ഡിസ്ചാർജ് ചെയ്തു. ആൻജിയോഗ്രാം പരിശോധനയ്ക്ക് ശേഷം ആരോഗ്യനില തൃപ്തികരമായതിനെത്തുടർന്ന് അദ്ദേഹത്തെ തിരുവനന്തപുരം സെൻട്രല്‍ ജയിലിലേക്ക് തിരികെ മാറ്റി.
SUMMARY: Sabarimala gold theft case: Murari Babu appears at ED office
