ബെംഗളൂരു: ബെംഗളൂരു – മൈസൂരു എക്സ്പ്രസ് വേയില് കുമ്പളകോടിന് സമീപം സർവീസ് റോഡില് കാറും ബൈക്കും കൂട്ടിയിടിച്ചുണ്ടായ അപകടത്തിൽ മലപ്പുറം സ്വദേശിയായ യുവാവ് മരണപ്പെട്ടു. എടവണ്ണ ചെമ്പക്കുത്ത് സ്വദേശി തനിയാടൻ വീട്ടിൽ അബ്ദുൽ റസാക്കിന്റെ മകൻ റിൻഷിദ് (24) ആണ് മരിച്ചത്. ശനിയാഴ്ച അർദ്ധരാത്രിയോടെയായിരുന്നു അപകടം. ബെംഗളൂരുവിലെ സ്വകാര്യ സ്കൂളിൽ ഡ്രൈവറായിരുന്നു. അപകടസ്ഥലത്ത് വെച്ച് തന്നെ മരണം സംഭവിച്ചു.
സെന്റ് ജോൺസ് ആശുപത്രിയിൽ പോസ്റ്റ്മോർട്ടം നടപടികൾ പൂർത്തിയാക്കിയ ശേഷം ഓൾ ഇന്ത്യ കെഎംസിസി ബെംഗളൂരു പ്രവർത്തകരുടെ നേതൃത്വത്തിൽ ശിഹാബ് തങ്ങൾ സെന്ററിൽ അന്ത്യകർമ്മങ്ങൾ പൂര്ത്തിയാക്കി മൃതദേഹം നാട്ടിലേക്ക് കൊണ്ടുപോയി. എടക്കര നാരോകാവ് ജുമാ മസ്ജിദ് ഖബർസ്ഥാനിലാണ് ഖബറടക്കം നടക്കുക.
മൂന്ന് മാസം മുൻപായിരുന്നു റിൻഷാദിന്റെ വിവാഹം. സാജിനയാണ് മാതാവ്. ഭാര്യ ഹാദിയ. ഫിൻഷിദ് ടി, സനതിൽ സിദാൻ, സിനാൻ, ജസ്വിൻ മഹസിൻ എന്നിവർ സഹോദരങ്ങളാണ്.
SUMMARY: Road accident in Bengaluru: Malayali youth dies
