തിരുവനന്തപുരം: ഇഞ്ചോടിച്ച് പോരാട്ടത്തിനൊടുവില് വട്ടിയൂർക്കാവ് മണ്ഡലം തിരിച്ചുപിടിച്ച് കോണ്ഗ്രസിന്റെ മുതിർന്ന നേതാവ് കെ മുരളീധരൻ. 2796 വോട്ടുകള്ക്കാണ് എല്ഡിഎഫിന്റെ വി കെ പ്രശാന്തിനെ പരാജയപ്പെടുത്തിയത്. എൻഡിഎയുടെ ആർ ശ്രീലേഖ മൂന്നാം സ്ഥാനത്തേയ്ക്ക് പിന്തള്ളപ്പെട്ടു.
2016-ല് മൂന്നാം സ്ഥാനത്തേക്ക് പിന്തള്ളപ്പെട്ട എല്.ഡി.എഫിനെ, 2019-ലെ ഉപതിരഞ്ഞെടുപ്പിലൂടെ ഒന്നാം സ്ഥാനത്തെത്തിച്ച മേയർ ബ്രോ വി.കെ. പ്രശാന്തിന് ഇത്തവണ മണ്ഡലം കൈവിടേണ്ടി വന്നു. 2021-ല് 21,515 വോട്ടുകളുടെ വൻ ഭൂരിപക്ഷത്തിന് ജയിച്ച പ്രശാന്തിനെയാണ് കെ. മുരളീധരൻ അട്ടിമറിച്ചത്. മുൻ ഡി.ജി.പി ആർ. ശ്രീലേഖ ബി.ജെ.പി സ്ഥാനാർത്ഥിയായി എത്തിയതോടെ മണ്ഡലത്തില് ശക്തമായ ത്രികോണ മത്സരമാണ് നടന്നത്.
എൻ.ഡി.എ പിടിച്ച വോട്ടുകള് ഇരുമുന്നണികളുടെയും ലീഡ് നിലയില് നിർണ്ണായക സ്വാധീനം ചെലുത്തി. നഗരസഭാ വാർഡുകളിലെ വോട്ടുകള് എണ്ണിത്തുടങ്ങിയപ്പോള് പ്രശാന്തും മുരളീധരനും മാറി മാറി ലീഡ് ചെയ്തെങ്കിലും അവസാന ഘട്ടത്തില് കെ. മുരളീധരൻ ലീഡ് നിലനിർത്തുകയായിരുന്നു.
SUMMARY: K Muraleedharan regains Vattiyoorkavu; wins by 2796 votes
