കണ്ണൂർ: പുതിയ മന്ത്രിസഭയുടെ സത്യപ്രതിജ്ഞയോടനുബന്ധിച്ച് നടത്തിയ ആഹ്ലാദ പരിപാടികൾക്കിടെ ഒമ്പതു വയസുകാരൻ സ്ഫോടനത്തിൽ മരിച്ചു. കണ്ണൂർ അഴീക്കോട് പുന്നക്കപാറ സ്വദേശി അമൻ ആണ് മരിച്ചത്. പുന്നക്കപ്പാറയിലെ കോൺഗ്രസ് ഓഫീസിന് സമീപം ഇന്ന് രാവിലെയാണ് സംഭവം.
വി.ഡി. സതീശൻ മന്ത്രിസഭ അധികാരമേറ്റതിൽ അഹ്ലാദം പ്രകടിപ്പിച്ച് കോൺഗ്രസ് പ്രവർത്തകർ ലഡു വിതരണം നടത്തുകയും പടക്കം പൊട്ടിക്കുകയും ചെയ്തിരുന്നു. ഇവിടെ ബാക്കി വന്ന പടക്കം ഒരു സ്ഥലത്ത് സൂക്ഷിച്ചുവച്ച ശേഷം പ്രവർത്തകർ പിരിഞ്ഞുപോയി. ഈ സമയം ഇവിടെയുണ്ടായിരുന്ന കുട്ടികൾ പടക്കം എടുത്ത് പൊട്ടിക്കുകയായിരുന്നു. പടക്കത്തിലെ വെടിമരുന്ന് ശേഖരിച്ച് കുട്ടികൾ വീണ്ടും നിറച്ചതായും ഇതിന് തീക്കൊളുത്തി എറിഞ്ഞതാണ് അപകടത്തിനിടയാക്കിയതെന്നും പറയപ്പെടുന്നു.
കഴുത്തിനേറ്റ പരുക്കാണ് മരണകാരണം. കണ്ണൂരിലുള്ള സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൂന്ന് കുട്ടികൾക്ക് നിസാരമായി പരുക്കേറ്റു.
SUMMARY: Accident during swearing-in ceremony; Nine-year-old dies after firecracker explodes in Kannur
