തൃശൂര്: കരുവന്നൂര് കള്ളപ്പണ ഇടപാട് കേസില് സിപിഐഎമ്മിനും നേതാക്കള്ക്കും തിരിച്ചടി. പ്രതികള്ക്കെതിരെ പ്രഥമദൃഷ്ട്യാ തെളിവുകള് ഉണ്ടെന്ന് കലൂര് പിഎംഎല്എ കോടതി. സിപിഐഎം നേതാക്കളായ കെ രാധാകൃഷ്ണന്, എ സി മൊയ്തീന്, എം എം വര്ഗീസ് അടക്കമുള്ള 28 പ്രതികള്ക്ക് കോടതി നോട്ടീസയച്ചു. അടുത്തമാസം നാലിന് കോടതിയിൽ നേരിട്ട് ഹാജരാകണമെന്നാണ് നിർദേശം. ബിഎന്എസ് പ്രകാരം കേസില് കുറ്റപത്രം സമര്പ്പിച്ചാല് പ്രതികള്ക്ക് അവരുടെ ഭാഗം പറയാന് അവസരമുണ്ട്. അത്തരത്തില് കരുവന്നൂര് കേസിലെ 28 പ്രതികള് തങ്ങള്ക്കെതിരെയുള്ള കേസ് കെട്ടിച്ചമച്ചതാണെന്ന് കോടതിയില് വാദിച്ചു. കെ രാധാകൃഷ്ണന്, എ സി മൊയ്ദീന്, എം എം വര്ഗീസ് അടക്കമുള്ളവരാണ് ഈ വാദം ഉന്നയിച്ചത്. എന്നാല്, കോടതി തള്ളി. പ്രതികള്ക്കെതിരെ പ്രഥമ ദൃഷ്ടിയാല് തെളിവുകള് ഉണ്ടെന്നും കോടതിയില് നേരിട്ട് ഹാജരാകണമെന്നും ആവശ്യപ്പെട്ടാണ് സമന്സ് അയച്ചത്. അടുത്തമാസം നാലിന് നേരിട്ട് ഹാജരാകാന് ആണ് നിര്ദ്ദേശം.
കരുവന്നൂരില് വന് തട്ടിപ്പു നടന്നതായും ബാങ്കിന് കോടികളുടെ നഷ്ടം ഉണ്ടായെന്നുമാണ് ഇഡിയുടെ കണ്ടെത്തല്. ബാങ്കിലെ ജീവനക്കാരും ഭരണസമിതി അംഗങ്ങളും ചേര്ന്ന് സാധാരണക്കാരായ നിക്ഷേപകരുടെ ആധാരങ്ങളും രേഖകളും ഉപയോഗിച്ച് അവരുടെ അറിവോ സമ്മതമോ ഇല്ലാതെ കോടിക്കണക്കിന് രൂപ വ്യാജ വായ്പയായി എടുത്തു. ഒരു വ്യക്തിക്ക് അനുവദിക്കാവുന്ന വായ്പാ പരിധി ലംഘിച്ച്, പലരുടെയും പേരില് ബെനാമി വായ്പകള് അനുവദിച്ച് കോടികള് തട്ടിയെടുത്തതായിട്ടാണ് ഇഡിയുടെ കണ്ടെത്തല്.
തട്ടിപ്പിലെ പ്രധാന പ്രതികളുടെയും ഇടനിലക്കാരുടെയും കോടിക്കണക്കിന് രൂപ വിലമതിക്കുന്ന സ്വത്തുക്കളും ബാങ്ക് അക്കൗണ്ടുകളും ഇഡി കണ്ടുകെട്ടിയിരുന്നു. കേസില് ആകെ 83 പ്രതികളാണ് ഉള്ളത്. പ്രതികള് തട്ടിപ്പിലൂടെ 180 കോടി രൂപ സമ്പാദിച്ചെന്നാണ് ഇ.ഡി ആരോപിക്കുന്നത്. പാർട്ടിയുടേത് ഉൾപ്പടെ 128.82 കോടി രൂപയുടെ ആസ്തികൾ ഇഡി കണ്ടുകെട്ടിയിരുന്നു.
SUMMARY: CPM hits back in Karuvannur Cooperative Bank fraud case; PMLA court says there is prima facie evidence, opponents should appear in court in person
