ബെംഗളൂരു: ബെംഗളൂരു സൗത്ത് താലൂക്കിലെ മഡപട്ടണയിലുള്ള കരിങ്കൽ ക്വാറിയിലുണ്ടായ അപകടത്തിൽ ഏഴ് തൊഴിലാളികൾ മരിച്ചു. മരിച്ചവരെല്ലാം ബീഹാർ സ്വദേശികളാണ്. വ്യാഴാഴ്ച പുലർച്ചെ ക്വാറിയിൽ ഖനന ജോലികൾ നടക്കുന്നതിനിടെയാണ് ദുരന്തം. ജോലിക്കിടെ ഭീമൻ പാറ അടർന്നുവീണ് തൊഴിലാളികൾ അതിനടിയിൽ കുടുങ്ങുകയായിരുന്നു. അപകടവിവരം ലഭിച്ചതോടെ പോലീസ്, അഗ്നിരക്ഷാസേന എന്നിവർ സ്ഥലത്തെത്തി രക്ഷാപ്രവർത്തനം നടത്തി.
Karnataka – At least nine workers are feared dead after a large rock collapsed at a stone quarry in Karnataka on Thursday.According to preliminary reports, the workers were engaged in excavation inside the quarry when the massive rock suddenly gave way and fell on them.The… pic.twitter.com/bAWEErNLV8
— NextMinute News (@nextminutenews7) July 2, 2026
അപകടത്തിൽ നിരവധി പേർക്ക് പരിക്കേറ്റിട്ടുണ്ട്. ഇവരെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു. പരുക്കേറ്റവരുടെ കൃത്യമായ എണ്ണം വ്യക്തമല്ലെങ്കിലും നിരവധി പേരുടെ പരുക്ക് ഗുരുതരമാണെന്നാണ് പ്രാഥമിക വിവരങ്ങൾ സൂചിപ്പിക്കുന്നത്. തൊഴിലാളികൾ എല്ലാം ദിവസക്കൂലിക്ക് ക്വാറിയിൽ ജോലിക്കായി എത്തുന്നവരാണ്.
ഏകദേശം 40 അടി ഉയരത്തിൽ നിന്ന് ഭീമാകാരമായ പാറക്കല്ല് തൊഴിലാളികളുടെ മേലേക്ക് തകർന്നു വീഴുകയായിരുന്നുവെന്ന് സംഭവസ്ഥലത്തുണ്ടായിരുന്ന മറ്റുള്ളവര്‍ പറഞ്ഞു. അപകടസമയത്ത് പതിനെട്ടോളം തൊഴിലാളികൾ സ്ഥലത്തുണ്ടായിരുന്നു. പാറയ്ക്കടിയിൽ കുടുങ്ങിപ്പോയ ഏഴുപേരും അപകട സ്ഥലത്ത് തന്നെ മരണപ്പെട്ടു.
സംഭവത്തെ തുടർന്ന് പ്രദേശത്ത് സുരക്ഷാ ക്രമീകരണങ്ങൾ ശക്തമാക്കി. ക്വാറിയുടെ പ്രവർത്തനത്തിൽ സുരക്ഷാ മാനദണ്ഡങ്ങൾ പാലിച്ചിരുന്നോയെന്നും അപകടത്തിന് പിന്നിലെ സാഹചര്യങ്ങൾ എന്താണെന്നും കണ്ടെത്താൻ പോലീസ് ഉൾപ്പെടെയുള്ള ബന്ധപ്പെട്ട വകുപ്പുകൾ അന്വേഷണം ആരംഭിച്ചിട്ടുണ്ട്. അപകടത്തിൽ മരിച്ചവരുടെ കുടുംബങ്ങൾക്ക് ആവശ്യമായ സഹായം ഉറപ്പാക്കുമെന്ന് അധികൃതർ അറിയിച്ചു.
SUMMARY: 7 workers from Bihar die after huge rock collapses in quarry near Bengaluru
