തിരുവനന്തപുരം: തിരുവനന്തപുരത്ത് ഓടിക്കൊണ്ടിരുന്ന കെ എസ് ആർ ടി സി ബസ്സിന് തീപിടിച്ചു. പട്ടം സെന്റ് മേരീസ് സ്കൂളിന് സമീപമാണ് സംഭവം. കൈതക്കാട് നിന്നും കിഴക്കേക്കോട്ടയിലേക്ക് പോവുകയായിരുന്ന സിറ്റി ഫാസ്റ്റ് ബസ്സിലാണ് അപകടമുണ്ടായത്. എഞ്ചിൻ ഭാഗത്തുനിന്നുമാണ് തീ പടർന്നതെന്നാണ് പ്രാഥമിക സൂചന. അപകടത്തില്‍ ഡ്രൈവർക്ക് പരുക്കേറ്റു. ഡ്രൈവറുടെ കൈയ്ക്ക് പൊള്ളലേല്‍ക്കുകയായിരുന്നു.
ബസ്സില്‍ നിന്നും തീ ഉയരുന്നതുകണ്ട നാട്ടുകാർ സമീപത്തെ ഹോട്ടലില്‍ നിന്നും വെള്ളമെടുത്ത് തീയണച്ചു. സംഭവത്തെക്കുറിച്ച്‌ കെ എസ് ആർ ടി സി അധികൃതരെത്തി വിശദമായ പരിശോധന നടത്തുമെന്ന് അറിയിച്ചിട്ടുണ്ട്. അതേസമയം അപകടസമയത്ത് ബസ്സില്‍ നിറയെ യാത്രക്കാരുണ്ടായിരുന്നെങ്കിലും ആർക്കും പരിക്കേറ്റിട്ടില്ല. തീ ഉയരുന്നത് ശ്രദ്ധയില്‍പ്പെട്ട ഉടൻ തന്നെ ബസ്സ് നിർത്തി യാത്രക്കാരെ സുരക്ഷിതമായി പുറത്തിറക്കുകയും തുടർന്ന് ഇവരെ മറ്റൊരു ബസ്സില്‍ കയറ്റി വിടുകയും ചെയ്തു.
SUMMARY: A moving KSRTC bus caught fire
