ഡൽഹി: രാജ്യത്തെ ഏറ്റവും വലിയ പൊതുമേഖലാ ധനകാര്യ സ്ഥാപനമായ സ്റ്റേറ്റ് ബാങ്ക് ഓഫ് ഇന്ത്യയില്‍ ബിരുദധാരികള്‍ക്കായി വൻ തൊഴിലവസരം. ബാങ്കിന്റെ ജൂനിയർ അസോസിയേറ്റ്സ് (കസ്റ്റമർ സപ്പോർട്ട് & സെയില്‍സ്) തസ്തികയിലേക്ക് ആകെ 7680 ഒഴിവുകള്‍ പ്രഖ്യാപിച്ചു. മുൻപരിചയമില്ലാതെ തന്നെ ബിരുദധാരികള്‍ക്ക് ഈ ജോലിയിലേക്ക് നേരിട്ട് അപേക്ഷിക്കാവുന്നതാണ്. മികച്ച പ്രമോഷൻ സാധ്യതകളുള്ള ഈ തസ്തികയിലേക്കുള്ള ഓണ്‍ലൈൻ അപേക്ഷകള്‍ ഓഗസ്റ്റ് 31 വരെ സമർപ്പിക്കാം.
ഒഴിവുകളുടെ ഘടനയും സംവരണവും
കേരളത്തില്‍ നിലവില്‍ ഒഴിവുകളില്ലെങ്കിലും, അയല്‍ സംസ്ഥാനങ്ങളായ തമിഴ്നാട്ടില്‍ 1410 ഒഴിവുകളും കർണാടകയില്‍ 760 ഒഴിവുകളും ലഭ്യമാണ്. അന്തർ സംസ്ഥാന സ്ഥലംമാറ്റം ആദ്യ അഞ്ചു വർഷത്തേക്ക് അനുവദിക്കില്ലെങ്കിലും, അതിനുശേഷം ഈ വിഷയം അനുഭാവപൂർവ്വം പരിഗണിക്കുന്നതാണ്.
ആകെ ഒഴിവുകളുടെ കാറ്റഗറി തിരിച്ചുള്ള കണക്ക് താഴെ പറയുന്നതാണ്.
ജനറല്‍: 3253
ഒ.ബി.സി. (പിന്നാക്കം): 1716
പട്ടികജാതി (SC): 1114
പട്ടികവർഗ്ഗം (ST): 837
സാമ്പത്തിക പിന്നാക്കം (EWS): 760
യോഗ്യതയും പ്രായപരിധിയും
വിദ്യാഭ്യാസ യോഗ്യത: അംഗീകൃത സർവകലാശാലാ ബിരുദം. 2026 ഡിസംബർ 31-നകം യോഗ്യത സർട്ടിഫിക്കറ്റ് ഹാജരാക്കാൻ കഴിയുമെങ്കില്‍, അവസാന വർഷ പരീക്ഷ ഫലം കാത്തിരിക്കുന്നവർക്കും അപേക്ഷിക്കാൻ അർഹതയുണ്ട്.
പ്രായപരിധി: 2026 ഏപ്രില്‍ 1 കണക്കാക്കി 20 വയസിനും 28 വയസ്സിനും ഇടയിലായിരിക്കണം പ്രായം. പിന്നാക്കം, പട്ടിക, ഭിന്നശേഷി വിഭാഗക്കാർക്ക് നിയമാനുസൃതമായ പ്രായപരിധി ഇളവുകള്‍ ലഭ്യമാണ്. എസ്.ബി.ഐ.യില്‍ അപ്രന്റീസ് ആയി പ്രവർത്തിച്ചവർക്ക് പ്രത്യേക ഇളവുകള്‍ക്ക് പുറമെ ഒരു വർഷം അധികമായി അനുവദിക്കും. വിമുക്തഭടന്മാർക്കും ചട്ടപ്രകാരമുള്ള ആനുകൂല്യങ്ങള്‍ ലഭിക്കും.
തിരഞ്ഞെടുപ്പ് രീതി
ഓണ്‍ലൈൻ പ്രിലിമിനറി പരീക്ഷ, മെയിൻ പരീക്ഷ, പ്രാദേശിക ഭാഷാ പരിജ്ഞാന ടെസ്റ്റ് എന്നീ മൂന്ന് ഘട്ടങ്ങളിലൂടെയാണ് ഉദ്യോഗാർത്ഥികളെ തിരഞ്ഞെടുക്കുന്നത്. കമ്പ്യൂട്ടറധിഷ്ഠിതമായി ഒബ്ജക്റ്റീവ് മാതൃകയിലാണ് പരീക്ഷകള്‍ നടത്തുക. ഓരോ തെറ്റുത്തരത്തിനും 0.25 മാർക്ക് നെഗറ്റീവ് മാർക്കിംഗ് ഉണ്ടായിരിക്കും.
പ്രിലിമിനറി പരീക്ഷ: 1 മണിക്കൂർ ദൈർഘ്യമുള്ള പരീക്ഷയില്‍ ആകെ 100 മാർക്കിന്റെ 100 ചോദ്യങ്ങള്‍ ഉണ്ടായിരിക്കും. ഇംഗ്ലീഷ് ഭാഷ (30 ചോദ്യങ്ങള്‍), ന്യൂമറിക്കല്‍ എബിലിറ്റി (35 ചോദ്യങ്ങള്‍), റീസണിങ് എബിലിറ്റി (35 ചോദ്യങ്ങള്‍) എന്നിങ്ങനെ 20 മിനിറ്റ് വീതമുള്ള മൂന്ന് വിഭാഗങ്ങളായാണ് പരീക്ഷ.
മെയിൻ പരീക്ഷ: 2 മണിക്കൂർ 40 മിനിറ്റ് ദൈർഘ്യമുള്ള മെയിൻ പരീക്ഷയില്‍ ആകെ 200 മാർക്കാണുള്ളത്. ജനറല്‍/ഫിനാൻഷ്യല്‍ അവേർനസ്സ്, ജനറല്‍ ഇംഗ്ലീഷ്, റീസണിങ് എബിലിറ്റി & കമ്പ്യൂട്ടർ ആപ്റ്റിറ്റ്യൂഡ്, ക്വാണ്ടിറ്റേറ്റീവ് ആപ്റ്റിറ്റ്യൂഡ് എന്നീ വിഭാഗങ്ങളില്‍ നിന്നായി ചോദ്യങ്ങള്‍ ചോദിക്കും. സംവരണ വിഭാഗക്കാർക്ക് മിനിമം മാർക്കില്‍ 5% ഇളവ് ലഭിക്കും. എസ്.ബി.ഐ.യില്‍ അപ്രന്റീസ് പരിശീലനം പൂർത്തിയാക്കിയവർക്ക് 5 മാർക്ക് ബോണസായി ലഭിക്കും.
ഭാഷാ പരിജ്ഞാന ടെസ്റ്റ്: മെയിൻ പരീക്ഷയിലെ മാർക്കിന്റെ അടിസ്ഥാനത്തില്‍ തയ്യാറാക്കുന്ന പ്രൊവിഷണല്‍ ലിസ്റ്റിന് ശേഷം പ്രാദേശിക ഭാഷാ ടെസ്റ്റ് നടക്കും. എസ്.എസ്.എല്‍.സി./ഹയർ സെക്കൻഡറി തലത്തില്‍ അതാത് സംസ്ഥാനത്തെ പ്രാദേശിക ഭാഷ ഒരു വിഷയമായി പഠിച്ചിട്ടുള്ളവർക്ക് ഈ ടെസ്റ്റ് എഴുതേണ്ടതില്ല.
SUMMARY: Major job opportunity at State Bank of India; applications accepted until August 31
