ബെംഗളൂരു: ബെംഗളൂരുവിലെ പീനിയയിൽ സ്കോഡ ഓട്ടോ ഇന്ത്യ പുതിയ ഉപഭോക്തൃ സേവനകേന്ദ്രം ആരംഭിച്ചു. പിപിഎസ് മോട്ടോഴ്സുമായി സഹകരിച്ചാണ് പുതിയ കേന്ദ്രം പ്രവർത്തനം ആരംഭിച്ചത്. വാഹനങ്ങളുടെ വിൽപ്പനാനന്തര സേവനങ്ങൾക്കൊപ്പം സ്കോഡയുടെ സർട്ടിഫൈഡ് പ്രീ-ഓൺഡ് കാറുകളുടെ വിൽപ്പനയ്ക്കുള്ള സൗകര്യവും ഇവിടെ ഒരുക്കിയിട്ടുണ്ട്.
പുതിയ കേന്ദ്രത്തിലെ സർട്ടിഫൈഡ് പ്രീ-ഓൺഡ് കാർ വിഭാഗത്തിന് 1,000 ചതുരശ്ര അടി വിസ്തൃതിയാണുള്ളത്. ഒരേസമയം രണ്ട് വാഹനങ്ങൾ പ്രദർശിപ്പിക്കാനുള്ള സൗകര്യവും ഇവിടെ ഒരുക്കിയിട്ടുണ്ട്. ഉപഭോക്താക്കൾക്ക് പരിശോധന പൂർത്തിയാക്കിയ പഴയ സ്കോഡ വാഹനങ്ങൾ വാങ്ങുന്നതിനും നിലവിലുള്ള വാഹനം കൈമാറ്റം ചെയ്യുന്നതിനുമുള്ള സേവനങ്ങൾ ലഭ്യമാകും.
കേന്ദ്രത്തോടനുബന്ധിച്ചുള്ള വാഹന സേവനകേന്ദ്രത്തിന് 11,700 ചതുരശ്ര അടി വിസ്തൃതിയുണ്ട്. ഒരേസമയം 20 വാഹനങ്ങൾ വരെ സർവീസ് ചെയ്യാൻ കഴിയുന്ന സർവീസ് ബേകൾ ഇവിടെ സജ്ജീകരിച്ചിട്ടുണ്ട്. പെയിന്റ് ബൂത്ത്, അതിവേഗ സർവീസ് വിഭാഗം തുടങ്ങിയ സൗകര്യങ്ങളും കേന്ദ്രത്തിലുണ്ട്.
സ്കോഡയുടെ ആഗോള ‘മോഡേൺ സോളിഡ്’ രൂപകൽപ്പനാ ശൈലി പിന്തുടർന്നാണ് പുതിയ ഉപഭോക്തൃ കേന്ദ്രം ഒരുക്കിയിരിക്കുന്നത്. വാഹനങ്ങളുടെ പതിവ് അറ്റകുറ്റപ്പണികൾ, പരിശോധന, സർവീസിംഗ്, മറ്റ് വിൽപ്പനാനന്തര സേവനങ്ങൾ എന്നിവ ഒരേ കേന്ദ്രത്തിൽ ലഭ്യമാക്കുകയാണ് ലക്ഷ്യം.
പീനിയയിലെ പുതിയ കേന്ദ്രം പ്രവർത്തനം ആരംഭിച്ചതോടെ ബെംഗളൂരുവിൽ സ്കോഡയുടെ ഉപഭോക്തൃ സേവനകേന്ദ്രങ്ങളുടെ എണ്ണം 20 ആയി. കർണാടകയിലെ 12 നഗരങ്ങളിലായി കമ്പനിക്ക് ആകെ 34 ഉപഭോക്തൃ സേവനകേന്ദ്രങ്ങളുണ്ടെന്ന് സ്കോഡ ഓട്ടോ ഇന്ത്യ അറിയിച്ചു. ബെംഗളൂരുവിന് പുറമെ ബെളഗാവി, ബെല്ലാരി, ദാവണഗെരെ, ഹാസൻ, ഹുബ്ബള്ളി, കലബുറഗി, മംഗളൂരു, മൈസൂരു, ശിവമൊഗ്ഗ, തുമകൂരു, ഉഡുപ്പി എന്നിവിടങ്ങളിലും കമ്പനിയുടെ സേവനകേന്ദ്രങ്ങൾ പ്രവർത്തിക്കുന്നുണ്ട്.
രാജ്യത്താകെ ഉപഭോക്തൃ സേവന ശൃംഖല 193 നഗരങ്ങളിലായി 346-ലധികം കേന്ദ്രങ്ങളിലേക്ക് വികസിപ്പിച്ചതായും കമ്പനി അറിയിച്ചു. കഴിഞ്ഞ ഏതാനും വർഷങ്ങളായി ഇന്ത്യയിലെ വിൽപ്പന, സേവന ശൃംഖല വിപുലീകരിക്കുന്നതിന്റെ ഭാഗമായാണ് പുതിയ കേന്ദ്രങ്ങൾ ആരംഭിക്കുന്നത്.
SUMMARY: Skoda’s new customer service center in Peenya
