തിരുവനന്തപുരം: ചലച്ചിത്ര സംവിധായകൻ സനല് കുമാർ ശശിധരനെതിരെ മാനനഷ്ടക്കേസുമായി പ്രമുഖ നടി മഞ്ജു വാര്യർ. നിരന്തരം തന്നെ അപമാനിക്കുന്ന തരത്തിലുള്ള പ്രതികരണങ്ങളും കുറിപ്പുകളും അപവാദപ്രചാരണങ്ങളും നടത്തുന്നുവെന്ന് ചൂണ്ടിക്കാട്ടി എറണാകുളം മുൻസിഫ് കോടതിയിലാണ് മഞ്ജു വാര്യർ മാനനഷ്ടക്കേസ് ഫയല് ചെയ്തത്.
സാമൂഹിക മാധ്യമങ്ങളിലൂടെ തനിക്കെതിരായി സനല് കുമാർ ശശിധരൻ പങ്കുവെച്ച എല്ലാ അപകീർത്തികരമായ കുറിപ്പുകളും പോസ്റ്റുകളും അടിയന്തരമായി പിൻവലിക്കണമെന്നും ഹർജിയില് നടി ആവശ്യപ്പെടുന്നു. ഹേമ കമ്മിറ്റി റിപ്പോർട്ടിലെ ലൈംഗിക ചൂഷണ ആരോപണങ്ങളില് ഉന്നതതല അന്വേഷണം നടത്തണമെന്നും തനിക്കെതിരെയുണ്ടായ കേസിന് പിന്നിലെ ഗൂഢാലോചന പുറത്തുകൊണ്ടുവരണമെന്നും ആവശ്യപ്പെട്ട് സനല് കുമാർ ശശിധരൻ സെക്രട്ടേറിയറ്റിന് മുന്നില് ആറ് ദിവസമായി അനിശ്ചിതകാല നിരാഹാര സത്യാഗ്രഹം നടത്തിവരികയാണ്.
തനിക്ക് ലഭിച്ച സംസ്ഥാന ചലച്ചിത്ര പുരസ്കാരങ്ങള് തെരുവില് വെച്ചാണ് അദ്ദേഹം സമരം ചെയ്യുന്നത്. സർക്കാരോ നിയമ സംവിധാനങ്ങളോ അടിയന്തര ഇടപെടല് നടത്താത്തതിനാലാണ് സമരത്തിലേക്ക് കടന്നതെന്ന് വ്യക്തമാക്കുന്നതിനിടെ മഞ്ജു വാര്യർക്കെതിരെയും അദ്ദേഹം മോശം പരാമർശങ്ങള് നടത്തിയിരുന്നു. ഇതിനെ തുടർന്നാണ് മഞ്ജു വാര്യർ ഇപ്പോള് നിയമനടപടിയുമായി രംഗത്തെത്തിയത്.
SUMMARY: Manju Warrier files defamation case against director Sanal Kumar Sasidharan
