ബെംഗളൂരു: യാത്രയ്ക്കിടെ 18കാരിയെ ലൈംഗികമായി ഉപദ്രവിക്കുകയും കാറിനുള്ളിൽ തടഞ്ഞുവെക്കുകയും ചെയ്തെന്ന പരാതിയിൽ കാബ് ഡ്രൈവർക്കെതിരെ ബെംഗളൂരു പോലീസ് കേസെടുത്തു.
സെപ്റ്റംബർ 20ന് പുലർച്ചെയായിരുന്നു സംഭവം. പുലർച്ചെ ഏകദേശം 1.30ഓടെ ഓൺലൈൻ കാബ് ബുക്ക് ചെയ്ത് യുവതി മുത്തശ്ശിയുടെ വീട്ടിലേക്ക് പോകുകയായിരുന്നു. ഡ്രൈവറുടെ സമീപത്തെ മുൻസീറ്റിലാണ് യുവതി ഇരുന്നത്. യാത്ര ആരംഭിച്ച് ഏകദേശം 15 മിനിറ്റിനുശേഷം യുവതി ഉറങ്ങിപ്പോയതായി പരാതിയിൽ പറയുന്നു.
തുടർന്ന് കാബ് നിർത്തിയതായി മനസ്സിലാക്കി ഉണർന്ന യുവതി, ഡ്രൈവർ തന്നെ അനുചിതമായി സ്പർശിക്കുന്നതായി ശ്രദ്ധിച്ചെന്നും പിന്നീട് ചുംബിക്കാൻ ശ്രമിച്ചതായും പരാതിയിൽ ആരോപിക്കുന്നു.
സംഭവത്തിന് പിന്നാലെ യുവതി കാറിൽ നിന്ന് പുറത്തിറങ്ങാൻ ശ്രമിച്ചെങ്കിലും ഡ്രൈവർ കാറിന്റെ വാതിലുകൾ പൂട്ടി വാഹനം വീണ്ടും ഓടിച്ചതായാണ് പരാതി. തുടർന്ന് യുവതി നിലവിളിക്കുകയും കാറിന്റെ ജനലിൽ തട്ടുകയും ചെയ്തതോടെ ഡ്രൈവർ ഒരു പാർക്കിന് സമീപം വാഹനം നിർത്തി യുവതിയെ ഇറക്കിവിട്ടു. യുവതിയുടെ ബാഗ് കാറിൽ തന്നെ മറന്നുപോയി. തുടർന്ന് ഓട്ടോറിക്ഷയിൽ മുത്തശ്ശിയുടെ വീട്ടിലെത്തിയ യുവതി സംഭവത്തെക്കുറിച്ച് ആദ്യം അമ്മയോട് പറയുകയും പിന്നീട് പോലീസിൽ പരാതി നൽകുകയും ചെയ്തു. കാബ് സർവീസ് സ്ഥാപനത്തിലും യുവതി പരാതി നൽകിയിരുന്നു. പിന്നീട് ഡ്രൈവറുടെ ചില സുഹൃത്തുക്കൾ യുവതിയുടെ ബാഗ് മുത്തശ്ശിയുടെ വീട്ടിലെത്തിച്ചു.
ബലപ്രയോഗം, ലൈംഗികാതിക്രമം, അന്യായമായി തടഞ്ഞുവെക്കൽ തുടങ്ങിയ വകുപ്പുകൾ പ്രകാരമാണ് ഡ്രൈവര്ക്കെതിരെ കേസ് രജിസ്റ്റർ ചെയ്തിരിക്കുന്നത്. ഇതര സംസ്ഥാനക്കാരനാണ് പ്രതിയെന്നും സംഭവത്തിന് പിന്നാലെ ഒളിവിൽ പോയ ഇയാളെ കണ്ടെത്താനുള്ള ശ്രമങ്ങൾ തുടരുകയാണെന്ന് പോലീസ് അറിയിച്ചു.
SUMMARY: Complaint of sexual assault against 18-year-old; Case against cab driver
