ബെംഗളൂരു: ദീപാവലി ആഘോഷത്തിനിടെ പടക്കങ്ങളുടെ ഉച്ചത്തിലുള്ള ശബ്ദം ഭയന്ന് 14 നില കെട്ടിടത്തിൽനിന്ന് ചാടിയ തെരുവുനായ ചത്തു. ബെംഗളൂരുവിലെ കന്നമംഗലയിലാണ് സംഭവം. എട്ടുമാസം പ്രായമുള്ള പെൺനായയാണ് മരിച്ചത്. നവംബർ ആറിന് രാത്രിയാണ് സംഭവം. നായയുടെ മൃതദേഹം അടുത്ത ദിവസം രാവിലെയാണ് കണ്ടെത്തിയത്.
നിർമാണത്തിലിരിക്കുന്ന 14 നില കെട്ടിടത്തിലായിരുന്നു നായ താമസിച്ചിരുന്നത്. കെട്ടിടത്തിലെ സുരക്ഷാ ജീവനക്കാരന്റെ സഹായത്തോടെ ഒരു മൃഗസ്നേഹിയാണ് നായയ്ക്ക് ഭക്ഷണവും പരിചരണവും നൽകിയിരുന്നത്. രണ്ടുമാസം മുമ്പ് നായയ്ക്ക് വന്ധ്യംകരണ ശസ്ത്രക്രിയയും നടത്തിയിരുന്നു.
നവംബർ ആറിന് രാത്രി പടക്കങ്ങളുടെ ഉച്ചത്തിലുള്ള ശബ്ദം കേട്ട് ഉറങ്ങിക്കിടന്ന നായ ഭയന്ന് കെട്ടിടത്തിന്റെ ഉയർന്ന നിലയിൽനിന്ന് താഴേക്ക് ചാടിയതാകാമെന്നാണ് മൃഗപരിപാലകയുടെ സംശയം. പിറ്റേന്ന് രാവിലെയാണ് മൃതദേഹം കണ്ടെത്തിയത്. ഇത്രയും നാൾ കെട്ടിടത്തിൽ സുരക്ഷിതമായി കഴിഞ്ഞിരുന്ന നായയ്ക്ക് പടക്കശബ്ദമാണ് ദുരന്തത്തിന് കാരണമായതെന്ന് അവർ പറഞ്ഞു.
Bengaluru has witnessed wanton bursting of illegal firecrackers beyond the prescribed limits. So severe has the sound of firecrackers been, that a stray dog in Kannamangala jumped off from a high floor of a 14-storey building to her death.
@anubhabroy_
https://t.co/qzM4m1xl3Q— TNIE Karnataka (@XpressBengaluru) November 9, 2026
കന്നമംഗലയിൽ മറ്റൊരു വളർത്തുനായയും പടക്കശബ്ദം കേട്ട് ഭയന്ന് ഓടിപ്പോയതായി റിപ്പോർട്ടുണ്ട്. കുടുംബത്തോടൊപ്പം നടക്കാനിറങ്ങിയപ്പോഴാണ് പെട്ടെന്ന് പടക്കം പൊട്ടിച്ചത്. ശബ്ദം കേട്ട് പരിഭ്രാന്തയായ നായ ഉടമയുടെ കൈയിൽനിന്ന് കുതറിമാറി ഓടിപ്പോവുകയായിരുന്നു.
ദീപാവലി ആഘോഷത്തിന് രാത്രി എട്ടുമുതൽ പത്തുവരെ മാത്രമേ ഹരിത പടക്കങ്ങൾ പൊട്ടിക്കാവൂവെന്ന് സംസ്ഥാന സർക്കാർ നിർദേശിച്ചിരുന്നെങ്കിലും ബെംഗളൂരുവിൽ സമയപരിധി ലംഘിച്ച് പടക്കങ്ങൾ പൊട്ടിക്കുന്നത് തുടരുകയാണെന്ന് മൃഗസംരക്ഷണ പ്രവർത്തകർ ആരോപിച്ചു.
