മുംബൈ: വീട്ടില്‍ ദീപാവലി ആഘോഷിക്കുന്നതിനിടെ തീപടർന്ന് ആറുപേർ മരിച്ചു. മഹാരാഷ്‌ട്രയില്‍ ധാരാശിവ് ജില്ലയിലെ യേദ്‌ഷി ഗ്രാമത്തില്‍ ഇന്ന് പുലർച്ചെ 2.30 ഓടെയാണ് അപകടം ഉണ്ടായത്. കത്തിച്ചുവച്ചിരുന്ന ചിരാതില്‍നിന്ന് തീപടർന്നതാണ് അപകടത്തിന് കാരണമെന്നാണ് പ്രാഥമിക നിഗമനം. വീടിന്റെ താഴത്തെ നിലയില്‍ പ്രവർത്തിച്ചിരുന്ന പലചരക്ക് കടയില്‍നിന്നാണ് തീ പടർന്നത്.
ഇതോടെ മുകളിലത്തെ നിലയില്‍ കുടുങ്ങിയ ആറുപേർക്കും രക്ഷപ്പെടാനായില്ല. കുടുംബത്തിലെ ഒരാള്‍ മാത്രമാണ് അപകടത്തില്‍നിന്ന് രക്ഷപ്പെട്ടത്. ഉത്തം ത്രിംബക് കരണ്ടെ, ചന്ദ്രകല ഉത്തം കരണ്ടെ, ഗോവിന്ദ് ഉത്തം കരണ്ടെ, ജ്യോതി ഗോവിന്ദ് കരണ്ടെ, ഗായത്രി ഗോവിന്ദ് കരണ്ടെ, സിദ്ധി ഗോവിന്ദ് കരണ്ടെ എന്നിവരാണ് മരിച്ചത്. മൃതദേഹങ്ങള്‍ പോസ്റ്റ്‌മോർട്ടത്തിനായി ധാരാശിവ് സർക്കാർ ആശുപത്രിയിലേക്ക് മാറ്റി.
ദീപാവലി ആഘോഷങ്ങളുടെ ഭാഗമായി പുലർച്ചെ രണ്ടുമണിവരെ കുടുംബാംഗങ്ങള്‍ ഉണർന്നിരുന്നുവെന്നാണ് പ്രാഥമിക വിവരം. പലചരക്ക് കടയില്‍ വലിയ അളവില്‍ പാചക എണ്ണയും നെയ്യും പ്ലാസ്റ്റിക് ഉല്‍പ്പന്നങ്ങളും സൂക്ഷിച്ചിട്ടുണ്ടായിരുന്നു. ഇത് തീപടരുന്നതിന്റെ വ്യാപ്‌തി വർദ്ധിപ്പിച്ചു.
SUMMARY: Fire breaks out during Diwali celebrations; six members of a family die from burns
