തിരുവനന്തപുരം: സംസ്ഥാനത്ത് അടുത്ത രണ്ട് മാസത്തേക്ക് വൈദ്യുതി പ്രതിസന്ധിക്ക് സാധ്യതയില്ലെന്നാണ് സർക്കാർ വൃത്തങ്ങള്‍ നല്‍കുന്ന സൂചന. ഈ കാലയളവില്‍ പുറത്തുനിന്ന് വൈദ്യുതി വാങ്ങേണ്ട സാഹചര്യം നിലവിലില്ലെന്ന് കെഎസ്‌ഇബി ചെയർമാൻ എൻ. പ്രശാന്തും ഊർജ സെക്രട്ടറിയും മുഖ്യമന്ത്രി വി.ഡി. സതീശനെ അറിയിച്ചതായാണ് വിവരം. വൈദ്യുതി ലഭ്യതയില്‍ ആശങ്കയില്ലാത്ത സാഹചര്യത്തില്‍ പുതിയ ഹ്രസ്വകാല ജിഎൻഎ (ഗ്രീൻ എനർജി ഓപ്പണ്‍ ആക്സസ്) കരാറുകള്‍ തല്‍ക്കാലം ഉണ്ടാകില്ല.
സുതാര്യമായ ടെൻഡർ നടപടികളോ സംസ്ഥാന വൈദ്യുതി റെഗുലേറ്ററി കമ്മീഷന്റെ മുൻകൂർ അനുമതിയോ ഇല്ലാതെ ജിഎൻഎ സംവിധാനത്തിലൂടെ 500 മെഗാവാട്ട് വൈദ്യുതി വാങ്ങാൻ നീക്കം നടത്തിയെന്നത് നേരത്തെ വലിയ വിവാദമായിരുന്നു. ഈ വിവാദത്തിന് പിന്നാലെയാണ് പുതിയ കരാറുകള്‍ വേണ്ടെന്ന നിലപാട്. വൈദ്യുതി പ്രതിസന്ധിയില്ലെങ്കില്‍ സംസ്ഥാനത്തെ വൈദ്യുതിക്ഷാമം എന്ന പ്രചാരണം കൃത്രിമമായി സൃഷ്ടിക്കപ്പെട്ടതാണോ എന്നാണ് സർക്കാർ സംശയിക്കുന്നത്.
വൈദ്യുതിക്ഷാമമെന്ന മുൻ കെ എസ് ഇ ബി ചെയർമാൻ രാജമാണിക്യത്തിന്റെ കുറിപ്പ് ഏത് സാഹചര്യത്തിലാണെന്ന് പരിശോധിക്കാൻ മുഖ്യമന്ത്രി നിർദ്ദേശം നല്‍കിയിട്ടുണ്ട്. ഉടൻ വൈദ്യുതി കരാറില്ലെങ്കില്‍ പവർ കട്ട് അനിവാര്യമെന്നായിരുന്നു രാജമാണിക്യത്തിന്റെ കുറിപ്പ്. അടിയന്തര തീരുമാനമെടുക്കണമെന്ന സമ്മർദത്തിന് പിന്നിലെന്തെന്നായിരുന്നുവെന്ന് പരിശോധിക്കും. പ്രതിസന്ധിയില്ലെങ്കില്‍ എന്തിന് ഹിമാചല്‍ വൈദ്യുതിക്ക് വേണ്ടി സമ്മർദം ചെലുത്തിയെന്നും മുഖ്യമന്ത്രി ആരാഞ്ഞതായാണ് വിവരം.
SUMMARY: Government withdraws from GNA agreement; decides not to purchase electricity for the time being
