ബെംഗളൂരു: ചിക്കബെല്ലാപുര ജില്ലയിലെ നന്ദി ഹിൽസിന് സമീപം ദേശീയപാത 44-ൽ കാറും ബൊലേറോ വാഹനവും കൂട്ടിയിടിച്ചുണ്ടായ അപകടത്തില് നാല് യുവാക്കൾ കൊല്ലപ്പെട്ടു. നന്ദിഗിരിധാം പോലീസ് സ്റ്റേഷന് തൊട്ടുമുന്നിലുള്ള ദേശീയപാതയിലാണ് അപകടം നടന്നത്. ബെംഗളൂരുവില് നിന്ന് ചിക്കബെല്ലാപുരയിലേക്ക് അഞ്ച് യുവാക്കളുമായി പോവുകയായിരുന്ന കാർ നിയന്ത്രണം വിട്ട് റോഡ് ഡിവൈഡർ മറികടന്ന് എതിർദിശയിൽ നിന്ന് വരികയായിരുന്ന ബൊലേറോ വാഹനത്തിലേക്ക് നേർക്കുനേർ ഇടിച്ചുകയറുകയായിരുന്നു.
കാറിലുണ്ടായിരുന്ന അഞ്ച് പേരിൽ നാല് യുവാക്കളും സംഭവസ്ഥലത്ത് വെച്ച് തന്നെ മരിച്ചു. മരിച്ചവരില് യെലഹങ്ക സ്വദേശികളായ ജഗദീഷ്, വൈഷ്ണവ് എന്നിവരെ തിരിച്ചറിഞ്ഞിട്ടുണ്ട്. ബാക്കിയുള്ളവരെ തിരിച്ചറിഞ്ഞിട്ടില്ല. കൂട്ടിയിടിയുടെ ആഘാതത്തിൽ കാർ പൂർണ്ണമായും തകർന്നു. ബൊലേറോയിലുണ്ടായിരുന്നവർ പരുക്കുകള് സംഭവിക്കാതെ രക്ഷപ്പെട്ടു.
അപകടം നടന്നയുടൻ നന്ദിഗിരിധാം പോലീസും നാട്ടുകാരും ചേർന്ന് രക്ഷാപ്രവർത്തനം നടത്തി. ഗുരുതരമായി പരുക്കേറ്റ അഞ്ചാമത്തെ യുവാവിനെ ചിക്കബെല്ലാപുര ജില്ലാ ആശുപത്രിയിൽ പ്രവേശിപ്പിച്ചു. ഇദ്ദേഹത്തിന്റെ ആരോഗ്യനില അതീവ ഗുരുതരമായി തുടരുകയാണ്.
അപകടത്തെ തുടർന്ന് ദേശീയപാതയിൽ കുറച്ചുനേരം ഗതാഗത തടസ്സമുണ്ടായി. നന്ദിഗിരിധാം പോലീസ് സംഭവത്തിൽ കേസെടുത്ത് കൂടുതൽ അന്വേഷണം നടത്തിവരികയാണ്.
SUMMARY: Car and Bolero collide near Nandi Hills; A tragic end for four young men















