ബെംഗളൂരു: നോർക്ക കെയർ ഇൻഷുറൻസ് പദ്ധതിയുടെ പ്രീമിയം വർധന പിൻവലിക്കണമെന്ന ആവശ്യവുമായി ബെംഗളൂരു മലയാളി ഫോറത്തിന്റെ നേതൃത്വത്തിൽ കേരള മുഖ്യമന്ത്രി വി.ഡി. സതീശന് നിവേദനം നല്കി. പ്രവാസി മലയാളികൾക്കും പ്രത്യേകിച്ച് ബെംഗളൂരുവില് താമസിക്കുന്ന സാധാരണക്കാരായ മലയാളികൾക്കും വലിയ സാമ്പത്തിക ബാധ്യത സൃഷ്ടിക്കുന്ന നോർക്ക കെയർ ഇൻഷുറൻസ് പ്രീമിയം വർധന പുനഃപരിശോധിച്ച് പിൻവലിക്കണമെന്നും, മുൻകാല പ്രീമിയം നിരക്കിൽ ഇൻഷുറൻസ് പരിരക്ഷ തുടരുന്നതിനുള്ള നടപടി സർക്കാർ സ്വീകരിക്കണമെന്നും നിവേദനത്തിൽ ആവശ്യപ്പെട്ടു.
കണ്ണൂരിൽ വെച്ചാണ് നിവേദനം സമര്പ്പിച്ചത്. ബെംഗളൂരു മലയാളി ഫോറം പ്രസിഡന്റ് ജോജോ പി ജെ, സെക്രട്ടറി ഷിബു ശിവദാസ്, ട്രഷറർ സജീവ് ഇ ജെ, ജോയിന്റ് ട്രഷറർ ചാർലി മാത്യു, മാനേജിംഗ് കമ്മിറ്റി അംഗംങ്ങളായ മധു കലമാനൂർ, അനിൽ ധർമ്മപതി, മുൻ ജോയന്റ് സെക്രട്ടറി അഡ്വ. മനോജ്,
കെഎംസിസിയെ പ്രതിനിധീകരിച്ചുകൊണ്ട് മുഹമ്മദ് എന്നിവര് നിവേദക സംഘത്തില് ഉണ്ടായിരുന്നു.
നന്മ ബാംഗ്ലൂരു കേരളസമാജം, ശ്രീനാരായണ സമിതി അൾസൂർ, സുവർണ്ണ കേരള സമാജം,കേരള എൻജിനിയേഴ്സ് അസോസിയേഷൻ, ക്രിസ്റ്റഫർ അസോസിയേഷൻ, കേരള സമാജം സിറ്റി സോൺ എന്നി സംഘടനകള് നിവേദക സംഘത്തിന് പിന്തുണ അറിയിച്ചു. പ്രവാസി മലയാളികളുടെ ക്ഷേമവും സുരക്ഷയും ഉറപ്പാക്കുന്നതിനായി സർക്കാർ അടിയന്തരമായി ഇടപെടണമെന്ന ആവശ്യവും സംഘടനകൾ മുന്നോട്ടുവച്ചു.
SUMMARY: Norka Care Insurance premium hike to be rolled back; A petition to the Chief Minister under the leadership of Bengaluru Malayali Forum
















