ഡല്‍ഹി ജംഗ്പുരയില്‍ 63 കാരനായ ഡോക്ടറെ താമസ്ഥലത്ത് കൊല്ലപ്പെട്ട നിലയില്‍ കണ്ടെത്തി. ജനറല്‍ ഫിസിഷ്യനായ യോഗേഷ് ചന്ദ്ര പോളിന്റെ മൃതദേഹം കൈകാലുകള്‍ ബന്ധിച്ച നിലയിലാണ് കണ്ടെത്തിയതെന്ന് പോലീസ് പറഞ്ഞു.
സംഭവത്തില്‍ പ്രാഥമിക അന്വേഷണത്തില്‍ കവര്‍ച്ച നടന്നതായും മൂന്നോ നാലോ പേര്‍ കൃത്യത്തില്‍ ഉള്‍പ്പെട്ടിട്ടുണ്ടെന്ന് സംശയിക്കുന്നതായും പോലീസ് അറിയിച്ചു. ജംഗ്പുര സി ബ്ലോക്കിലെ റെസിഡന്‍ഷ്യല്‍ കെട്ടിടത്തിന്റെ ഒന്നാം നിലയിലാണ് ഡോക്ടര്‍ താമസിച്ചിരുന്നത്. വെള്ളിയാഴ്ച്ച വൈകുന്നേരമാണ് ഡോക്ടറുടെ മൃതദേഹം കണ്ടെത്തുന്നത്.
കൊല്ലപ്പെട്ട പോളിന്റെ ഭാര്യ നീനയും ഡല്‍ഹി സര്‍ക്കാര്‍ ആശുപത്രിയില്‍ ഡോക്ടറാണ്. ഡോക്ടര്‍ ദമ്ബതികളുടെ വളര്‍ത്തുനായ്ക്കളെ മറ്റൊരു മുറിയില്‍ പൂട്ടിയിട്ട നിലയില്‍ കണ്ടെത്തിയതായി പൊലീസ് പറഞ്ഞു. സംഭവത്തില്‍ കൂടുതല്‍ അന്വേഷണം നടക്കുകയാണെന്നും പോലീസ് പറഞ്ഞു.
