ബെംഗളൂരു: ബെംഗളൂരുവിന്റെ കല, സംസ്കാരം, സാഹിത്യം, സംഗീതം, ഭക്ഷണം, പൈതൃകം എന്നിവ ആഘോഷിക്കുന്ന ‘ബെംഗളൂരു ജാത്രെ’ ഡിസംബർ 4 മുതൽ 13 വരെ നടക്കും. 10 ദിവസത്തെ നഗരവ്യാപക ആഘോഷത്തിന് സംസ്ഥാന സർക്കാർ രൂപം നൽകുന്നതായി ഗ്രേറ്റർ ബെംഗളൂരു വികസന മന്ത്രി കൃഷ്ണ ബൈരേഗൗഡ അറിയിച്ചു.
ഒറ്റ വേദിയിൽ മാത്രം പരിപാടികൾ നടത്തുന്നതിന് പകരം നഗരത്തിലെ വിവിധ പ്രദേശങ്ങളിലായി സാംസ്കാരിക പരിപാടികൾ, സംഗീതം, നൃത്തം, കലാപ്രദർശനങ്ങൾ, ഭക്ഷ്യമേളകൾ, സാഹിത്യ-ശാസ്ത്ര പരിപാടികൾ എന്നിവ സംഘടിപ്പിക്കാനാണ് പദ്ധതി.
ഗ്രേറ്റർ ബെംഗളൂരു അതോറിറ്റി പ്രധാന ഏകോപന ഏജൻസിയായിരിക്കും. ബി.എം.ആർ.സി.എൽ, ബി.ഡി.എ, ബി.ഡബ്ല്യു.എസ്.എസ്.ബി, ബെസ്കോം, പോലീസ്, അഗ്നിരക്ഷാ വിഭാഗം, കന്നഡ-സാംസ്കാരിക വകുപ്പ് തുടങ്ങിയവയും പരിപാടിയിൽ സഹകരിക്കും.
‘ബെംഗളൂരുകാർക്കായി, ബെംഗളൂരുകാരുടെ ജാത്രെ’ എന്ന ആശയത്തിൽ നടക്കുന്ന ആഘോഷത്തിൽ 300-ലധികം പരിപാടികൾ സംഘടിപ്പിക്കാനാണ് ലക്ഷ്യമിടുന്നത്. ഏകദേശം 15–20 കോടി ചെലവ് പ്രതീക്ഷിക്കുന്നതായി മന്ത്രി അറിയിച്ചു.
SUMMARY: ‘Bengaluru Jathre’ from December 4
