കൊല്‍ക്കത്ത: വിദ്വേഷ പ്രസംഗ കേസില്‍ തൃണമൂല്‍ കോണ്‍ഗ്രസ് എം പി മഹുവ മൊയ്ത്രയ്ക്ക് കല്‍ക്കട്ട ഹൈക്കോടതി അനുവദിച്ച ഇടക്കാല മുന്‍കൂര്‍ ജാമ്യം 2027 ജനുവരി 29 വരെ നീട്ടി. കേസില്‍ അറസ്റ്റ് ഉള്‍പ്പെടെയുള്ള കടുത്ത നടപടികളില്‍ നിന്നുള്ള സംരക്ഷണമാണ് ജസ്റ്റിസ് സൗഗത ഭട്ടാചാര്യയുടെ സിംഗിള്‍ ബെഞ്ച് നീട്ടി നല്‍കിയത്. സംസ്ഥാന സര്‍ക്കാരിന് വേണ്ടി ഹാജരായ അഡ്വക്കേറ്റ് ജനറല്‍ സുരോജിത് നാഥ് മിത്ര കോടതിയില്‍ റിപോര്‍ട്ട് സമര്‍പ്പിച്ചു.
ഓഗസ്റ്റ് 14ന് നാദിയ ജില്ലയിലെ ഹൊഗല്‍ബേറിയ പോലീസ് സ്റ്റേഷനില്‍ മഹുവ ഹാജരായെന്നും അന്വേഷണ ഉദ്യോഗസ്ഥരുടെ ചോദ്യങ്ങള്‍ക്ക് മറുപടി നല്‍കിയെന്നും റിപ്പോർട്ടില്‍ വ്യക്തമാക്കി. വിദ്വേഷ പ്രസംഗവുമായി ബന്ധപ്പെട്ട അന്വേഷണം തുടരുകയാണെന്നും റിപ്പോർട്ടില്‍ അറിയിച്ചു. ഓഗസ്റ്റ് 14ന് പോലീസ് സ്റ്റേഷനില്‍ ഹാജരായപ്പോള്‍ മഹുവയ്ക്ക് നേരെ മുട്ടയെറിഞ്ഞിട്ടില്ലെന്ന് അവരുടെ അഭിഭാഷകൻ കോടതിയെ അറിയിച്ചു.
നാദിയ ജില്ലയിലെ കൃഷ്ണനഗർ മണ്ഡലത്തില്‍ സന്ദർശനം നടത്തുമ്പോഴെല്ലാം തനിക്കെതിരേ ഇത്തരം ആക്രമണങ്ങള്‍ നടക്കാറുണ്ടെന്ന് മഹുവ നേരത്തെ ആരോപിച്ചിരുന്നു. ഇരുപക്ഷത്തിന്‍റെയും വാദം കേട്ട ജസ്റ്റിസ് സൗഗത ഭട്ടാചാര്യയാണ് ഇടക്കാല സംരക്ഷണം 2027 ജനുവരി 29 വരെ നീട്ടിയത്. കേസില്‍ അടുത്ത വാദം ജനുവരി 13ന് നടക്കും. ഹൊഗല്‍ബേറിയ പോലീസ് സ്റ്റേഷനില്‍ രജിസ്റ്റർ ചെയ്ത കേസിലെ ക്രിമിനല്‍ നടപടികള്‍ റദ്ദാക്കണമെന്നാവശ്യപ്പെട്ടാണ് കൃഷ്ണനഗർ എംപിയായ മഹുവ കോടതിയെ സമീപിച്ചത്.
തനിക്കെതിരേ കെട്ടിച്ചമച്ചതും പ്രേരിതവുമായ ആരോപണങ്ങളാണ് ഉന്നയിച്ചിരിക്കുന്നതെന്നും അവർ ഹർജിയില്‍ ആരോപിച്ചു. ജൂലൈ 21ന് ഇടക്കാല സംരക്ഷണം അനുവദിച്ച കോടതി, ഓഗസ്റ്റ് 14ന് അന്വേഷണ ഉദ്യോഗസ്ഥന് മുന്നില്‍ ഹാജരാകാൻ മഹുവയോട് നിർദേശിച്ചിരുന്നു. നിശ്ചയിച്ച വ്യവസ്ഥകള്‍ പാലിക്കുന്ന സാഹചര്യത്തില്‍ ഒക്റ്റോബർ 5 വരെ നി‍യമ നടപടികള്‍ സ്വീകരിക്കരുതെന്നും കോടതി അന്ന് നിർദേശിച്ചിരുന്നു.
SUMMARY: Hate speech case: Interim protection for Trinamool MP Mahua Moitra extended until January 29
