ന്യൂഡല്ഹി: ഇന്ത്യ തങ്ങളുടെ തന്ത്രപ്രധാനമായ വ്യോമതാവളങ്ങള് ആക്രമിച്ചുവെന്ന് സമ്മതിച്ച് പാക് പ്രധാനമന്ത്രി ഷെഹബാസ് ഷെരീഫ്. വെള്ളിയാഴ്ച സൈനികോദ്യോഗസ്ഥര് ഉള്പ്പെടെ പങ്കെടുത്ത ചടങ്ങിലാണ് പാക് പ്രധാനമന്ത്രിയുടെ പ്രസ്താവന.
റാവല്പിണ്ടിയിലെ നുര്ഖാന് ഉള്പ്പെടെയുള്ള തന്ത്രപ്രധാനമായ പാക് വ്യോമതാവളങ്ങളിൽ ഇന്ത്യ ആക്രമണം നടത്തിയ കാര്യം സൈനിക മേധാവി അസിം മുനിര് തന്നെ വിളിച്ച് പറഞ്ഞുവെന്നാണ് ഷെഹബാസ് ഷെരീഫ് പറഞ്ഞത്. ”ജനറല് മുനീര് പുലര്ച്ചെ 2.30 ന് എന്നെ നേരിട്ട് വിളിച്ച് ആക്രമങ്ങളേക്കുറിച്ച് അറിയിച്ചു. നൂര്ഖാന് ഉള്പ്പെടെ നമ്മുടെ എയര് ബേസുകള് ആക്രമിക്കപ്പെട്ടു. അത് വളരെ ആശങ്കാജനകമായ നിമിഷമായിരുന്നു” – പാക് പ്രധാനമന്ത്രി പറഞ്ഞു
ഷെഹബാസ് ഷെരീഫ് നടത്തിയ പ്രസ്താവനയുടെ വീഡിയോ ബിജെപി നേതാവ് അമിത് മാളവ്യ എക്സില് പങ്കുവെച്ചു. ഓപ്പറേഷന് സിന്ദൂറിന്റെ കൃത്യതയും അതിന്റെ വ്യാപ്തിയും വ്യക്തമാക്കുന്നതാണ് പാക് പ്രധാനമന്ത്രിയുടെ പ്രതികരണമെന്ന് പറഞ്ഞാണ് അമിത് മാളവ്യ ഈ വീഡിയോ പോസ്റ്റ് ചെയ്തത്. ഓപ്പറേഷന് സിന്ദൂറിന്റെ ഭാഗമായി ഭീകരകേന്ദ്രങ്ങള്ക്ക് നേരെ ഇന്ത്യ മിസൈലുകളും ഡ്രോണുകളും ഉപയോഗിച്ച് ആക്രമണം നടത്തിയിരുന്നു. ഇന്ത്യയുടെ ആക്രമണത്തില് 100ല് അധികം ഭീകരവാദികളാണ് കൊല്ലപ്പെട്ടത്.
അതേസമയം, പഹല്ഗാം ഭീകരാക്രമണത്തെതുടര്ന്ന് അടച്ച ഇന്ത്യ പാക് അതിര്ത്തിയായ അട്ടാരി വാഗ ബോര്ഡര് 23 ദിവസത്തെ ഇടവേളയ്ക്ക് ശേഷം തുറന്നു. അഫ്ഗാനിസ്ഥാനില് നിന്നും ഡ്രൈ ഫ്രൂട്ട്സുമായി എത്തിയ എട്ട് ട്രക്കുകളാണ് അതിര്ത്തി വഴി ഇന്ത്യയിലേക്കെത്തിയത്. കേന്ദ്രസര്ക്കാരിന്റെ പ്രത്യേക അനുമതി പ്രകാരമാണ് നടപടി. ഇന്തോ ഫോറിന് ചേമ്പര് ഓഫ് കൊമേഴ്സ് പ്രസിഡന്റ് ബി കെ ബജാജ് ട്രക്കുകള് അതിര്ത്തി കടന്നതായി സ്ഥിരീകരിച്ചു.
ഇന്ത്യ പാക് സംഘര്ഷത്തിന്റെ പശ്ചാത്തലത്തില് 150 ഓളം ചരക്കു ലോറികള് ലാഹോറിനും വാഗയ്ക്കുമിടയില് കുടുങ്ങിയിരുന്നു. വെടിനിര്ത്തല് ധാരണ നിലവില് വന്നതോടെയാണ് അഫ്ഗാന് ചരക്കുവാഹനങ്ങള്ക്ക് മാത്രമായി അതിര്ത്തി തുറന്നത്. ഏപ്രില് 24 മുതല് അട്ടാരി അതിര്ത്തിയില് കുടുങ്ങിക്കിടക്കുകയായിരുന്നു ഈ ചരക്കു ലോറികള്.
<BR>
TAGS : INDIA PAKISTAN CONFLICT | OPERATION SINDOOR
SUMMARY : Pakistan PM admits India attacked Pakistani airbases
WhatsApp
Telegram
