ഡോ. സുഷമ ശങ്കറിന് ‘ബാലദീപ്തി പുരസ്കാരം’

ബെംഗളൂരു: കന്നഡ – മലയാളം എഴുത്തുകാരിയും, വിവർത്തകയുമായ ഡോ. സുഷമ ശങ്കറിന് ബാലസാഹിത്യ മേഖലയിൽ അതുല്യമായ സേവനം അനുഷ്ഠിച്ചതിനുള്ള അംഗീകാരമായി ചിൽഡ്രൻസ് അക്കാദമി, ധാർവാഡ്, കർണാടകത്തിൻ്റെ ബാലദീപ്തി രജത പുരസ്കാരം.

കന്നഡ ഭാഷയെയും സാഹിത്യത്തെയും സംസ്കാരത്തെയും ബാലമനസ്സുകളിലേക്ക്പ്രചരിപ്പിക്കുന്നതിനായി കഴിഞ്ഞ പതിമൂന്ന് വർഷങ്ങളായി തൊദൽനുടി എന്ന കുട്ടികളുടെ കന്നഡ മാസികയുടെ എഡിറ്ററായ ഡോ. സുഷമയുടെ ദീർഘകാല പരിശ്രമങ്ങളാണ് ഈ പുരസ്കാരത്തിന് അർഹയാക്കിയതെന്ന് അക്കാദമിയുടെ പ്രസിഡന്റ് ഡോ. രാജൻ ദേശ്‌പാണ്ഡെ അറിയിച്ചു.

ഒക്ടോബർ 26-ാം തീയതി വൈകിട്ട് 4 മണിക്ക് ധാർവാഡിലെ ആലൂർ വെങ്കടറാവു ഓഡിറ്റോറിയത്തിൽ നടക്കുന്ന ചിൽഡ്രൻസ് അക്കാദമിയുടെ രജതമഹോത്സവത്തിൽ അവാർഡ് സമ്മാനിക്കും. പതിനേഴ് വർഷങ്ങളായി സൗജന്യമായി കന്നഡ പഠിപ്പിക്കുന്ന ഡോ.സുഷമ മലയാളം മിഷൻ്റെ അമ്മ മലയാളം പഠനക്ളാസ്സും നടത്തിവരുന്നു. കഴിഞ്ഞ 30 വർഷങ്ങളായി വൈറ്റ് ഫീൽഡിൽ ശ്രീ സരസ്വതി എജുക്കേഷൻ ട്രസ്റ്റ് എന്ന വിദ്യാഭ്യാസ സ്ഥാപനം നടത്തി വരുന്ന സുഷമ ഈ ബഹുമതിക്ക് അർഹയാകുന്ന ആദ്യ മലയാളിയാണ്.
ദ്രാവിഡ ഭാഷാ ട്രാൻസ്ലേറ്റേർസ് അസോസിയേഷൻ്റെ പ്രസിഡൻ്റാണ് കൊല്ലം കണ്ണനല്ലൂർ സ്വദേശിയായ സുഷമ ശങ്കർ.
SUMMARY: Dr. Sushma Shankar to be conferred with ‘Baladeepti Award’