ബെംഗളൂരു: മലയാളം മിഷൻ കർണാടക ചാപ്റ്റർ പഠനോത്സവം നവംബർ 23ന് ബെംഗളൂരു മൈസൂരു എന്നിവിടങ്ങളിൽ നടക്കും. പഠനോത്സവത്തില്‍ ചാപ്റ്റർ ഭാരവാഹികള്‍, പഠന കേന്ദ്രങ്ങളിലെ അധ്യാപകര്‍, വിദ്യാര്‍ഥികള്‍, രക്ഷിതാക്കള്‍ എന്നിവര്‍ പങ്കെടുക്കും. കുട്ടികളുടെ വിവിധ കലാപരിപാടികളും ഉണ്ടായിരിക്കും.
ബെംഗളൂരു വിമാനപുര കൈരളി നിലയം സ്കൂളിൽ രാവിലെ 8 30ന് ആരംഭിക്കുന്ന പഠനോത്സവത്തിൽ എഴുത്തുകാരൻ സുധാകരൻ രാമന്തളി, കൈരളി കലാസമിതി ജനറൽ സെക്രട്ടറി പി.കെ. സുധീഷ്, ബാംഗ്ലൂർ കേരള സമാജം പ്രസിഡന്റ് ഹനീഫ് എം, സെക്രട്ടറി റജികുമാർ എന്നിവർ മുഖ്യാതിഥികൾ ആകും.
മൈസൂരു ഡി പോൾ പബ്ലിക് സ്കൂളില്‍ രാവിലെ 8 30 മുതൽ നടക്കുന്ന പഠനോത്സവം ഫാ. ജോമഷ് മോളാല വി സി ഉദ്ഘാടനം ചെയ്യും. ചാപ്റ്റർ വൈസ് പ്രസിഡന്റ് പി സുരേഷ് ബാബു, മേഖലാ കോഡിനേറ്റർ എം.പി പ്രദീപ്കുമാർ, എന്നിവർ നേതൃത്വം നൽകും. മലയാളം മിഷൻ പാഠ്യപദ്ധതിയുടെ വിവിധ പരീക്ഷകളില്‍ വിജയിച്ച വിദ്യാർഥികൾക്കുള്ള സർട്ടിഫിക്കറ്റുകൾ ചടങ്ങിൽ വിതരണം ചെയ്യും. കേരളസമാജം പ്രസിഡൻ്റ് പി എസ് നായർ, മുദ്ര മലയാള വേദി പ്രസിഡൻ്റ് വിനോദ്, റെയിൽവേ മലയാളി അസോസിയേഷൻ പ്രസിഡൻ്റ് സുരേഷ്, പ്രസാദ് ജോസ്, സുവർണ കർണാടക സംസ്ഥാന കമ്മറ്റി ജോയിന്റ് സെക്രട്ടറി അബൂബക്കർ എന്നിവർ പങ്കെടുക്കും.നീലകുറിഞ്ഞി പരീക്ഷയില്‍ വിജയിച്ച ആര്‍ദ്ര എ, അനുശ്രീ കെ.എ, ഷംനാസ് അബൂബക്കര്‍ എന്നീ വിദ്യാര്‍ഥികളെ ചടങ്ങില്‍ ആദരിക്കും.
SUMMARY: Malayalam Mission Karnataka Chapter Study Festival on 23rd
