മാന്നാർ: ആലപ്പുഴ മാന്നാറില്‍ സംസ്ഥാന പാതയില്‍ ഓടിക്കൊണ്ടിരുന്ന കാറിന് തീപിടിച്ചു. കാറില്‍ യാത്ര ചെയ്തിരുന്ന നാലംഗ കുടുംബം തീപിടിത്തത്തിന് പിന്നാലെ അത്ഭുതകരമായി രക്ഷപ്പെട്ടു. അപകടത്തില്‍ കാർ പൂർണമായും കത്തിനശിച്ചു. തട്ടാരമ്പലം-മാന്നാർ സംസ്ഥാന പാതയില്‍ തിങ്കളാഴ്ച രാത്രി 10.45ഓടെയാണ് അപകടമുണ്ടായത്. മാവേലിക്കര ചെട്ടികുളങ്ങര സ്വദേശിയും കുടുംബവും സഞ്ചരിച്ച കാറിനാണ് തീപിടിച്ചത്.
മാന്നാറില്‍ വിവാഹച്ചടങ്ങില്‍ പങ്കെടുത്ത് മടങ്ങുകയായിരുന്നു കുടുംബം. വാഹനത്തിനുള്ളില്‍ നിന്ന് ചെറിയ തീപ്പൊരിയും പുകയും ഉയരുന്നത് ശ്രദ്ധയില്‍പ്പെട്ടതിനെ തുടർന്ന് യാത്രക്കാർ വാഹനം നിർത്തി പുറത്തിറങ്ങുകയായിരുന്നു. ഇവർ പുറത്തിറങ്ങിയതിന് പിന്നാലെ കാറില്‍ തീ ആളിപ്പടർന്നു. അപകടത്തെ തുടർന്ന് മാവേലിക്കരയില്‍ നിന്നെത്തിയ അഗ്നിശമനസേനയാണ് തീ പൂർണമായും കെടുത്തിയത്. മാന്നാർ പോലീസും സ്ഥലത്തെത്തിയിരുന്നു.
SUMMARY: A moving car caught fire in Alappuzha; a family of four had a miraculous escape
