ബെംഗളൂരു: ഗൾഫ് മേഖലയിലുൾപ്പെടെ നിലനിൽക്കുന്ന യുദ്ധാന്തരീക്ഷം ഏറെ വേദനാജനകമാണെന്നും അധികാരമോഹങ്ങൾ നടത്തുന്ന പോരാട്ടങ്ങളിൽ എന്നും ഇരയാക്കപ്പെടുന്നത് നിഷ്കളങ്കരായ മനുഷ്യരാണെന്നും പാണക്കാട് സയ്യിദ് സാദിഖലി ശിഹാബ് തങ്ങൾ. യുദ്ധം വിതക്കുന്നവർ തന്നെ അത് അവസാനിപ്പിക്കാൻ മുൻകൈ എടുക്കണം. ലോകം സമാധാനത്തിലേക്ക് എത്രയും വേഗം മടങ്ങിയെത്താൻ നമുക്ക് പ്രാർത്ഥിക്കാം- അദ്ദേഹം ആഹ്വാനം ചെയ്തു. ഓൾ ഇന്ത്യ കെഎംസിസി ബെംഗളൂരു സെൻട്രൽ കമ്മിറ്റി പാലസ് ഗ്രൗണ്ടിലെ വൈറ്റ് പെറ്റൽസ് ഓഡിറ്റോറിയത്തിൽ സംഘടിപ്പിച്ച ‘ഗ്രാൻഡ് ഇഫ്താർ സംഗമം’ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. അയ്യായിരത്തോളം ആളുകൾ സംഗമത്തിൽ പങ്കെടുത്തു.
ആത്മസംസ്കരണത്തിന്റെയും ക്ഷമയുടെയും മാസമായ റമദാൻ മനുഷ്യനെ സഹജീവികളോട് കൂടുതൽ കരുണയുള്ളവനാക്കി മാറ്റുന്നുവെന്ന് തങ്ങൾ ഓർമ്മിപ്പിച്ചു. വിശപ്പും ദാഹവും അനുഭവിച്ചറിയുന്നതിലൂടെ പാവപ്പെട്ടവന്റെ വേദന തിരിച്ചറിയാനാണ് നോമ്പ് നമ്മെ പഠിപ്പിക്കുന്നത്. ഇത്തരം ഒത്തുചേരലുകൾ ജാതിമത ഭേദമന്യേ മനുഷ്യരെ തമ്മിൽ ബന്ധിപ്പിക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു.
ജീവകാരുണ്യ പ്രവർത്തനങ്ങളിൽ മാതൃകയായ അന്തരിച്ച പ്രമുഖ വ്യവസായി പി.എ. ഇബ്രാഹിം ഹാജിയുടെ സ്മരണക്കായി അദ്ദേഹത്തിന്റെ കുടുംബം നൽകിയ അത്യാധുനിക ഐസിയു/എൻഐസിയു ഡി-ലെവൽ ആംബുലൻസ് ചടങ്ങിൽ വെച്ച് സാദിഖലി തങ്ങൾ നാടിന് സമർപ്പിച്ചു. ഇബ്രാഹിം ഹാജിയുടെ മകൻ പി.എ. അബ്ദുള്ള ഇബ്രാഹിം താക്കോൽ കൈമാറി. കാരുണ്യ പ്രവർത്തനങ്ങൾ കേവലം പ്രസംഗത്തിലല്ല, മറിച്ച് പ്രവൃത്തിയിലാണ് കാണിക്കേണ്ടതെന്ന വലിയ സന്ദേശമാണ് ഇതിലൂടെ എഐകെഎംസിസി നൽകുന്നതെന്നും തങ്ങൾ കൂട്ടിച്ചെർത്തു. പാണക്കാട് സയ്യിദ് ഹൈദരലി ശിഹാബ് തങ്ങളുടെ വേർപാടിന്റെ നാലാം വാർഷികത്തോടനുബന്ധിച്ചുള്ള അനുസ്മരണ പ്രഭാഷണവും ചടങ്ങിൽ നടന്നു.
മുനിസിപ്പൽ അഡ്മിനിസ്ട്രേഷൻ മന്ത്രി റഹീം ഖാൻ, കർണാടക നിയമസഭാ സ്പീക്കർ യു.ടി. ഖാദർ, മുഖ്യമന്ത്രിയുടെ പൊളിറ്റിക്കൽ സെക്രട്ടറി നസീർ അഹ്മദ്, കർണാടക സർക്കാർ ചീഫ് വിപ് സലീം അഹ്മദ് എം എൽ സി, ഡോ. പി.സി. ജാഫർ ഐ.എ.എസ്, എന്നിവർ വിശിഷ്ടാതിഥികളായി സംസാരിച്ചു. വിവിധ മേഖലകളിൽ മികവ് പുലർത്തിയ ഡോ. വികാസ്, അഡ്വ. ഇല്യാസ്, പി.കെ. ഷക്കീർ, കാഷിഫ് പാഷ, കാസർഗോഡ് മുനിസിപ്പൽ വൈസ് ചെയർമാൻ കെഎം ഹനീഫ്, സോമയ്യ, മധു എന്നിവരെ മൊമെന്റോ നൽകി ആദരിച്ചു. വിദ്യാർത്ഥികൾക്കായി സോഷ്യൽ എംപവർമെന്റ് മിഷനുമായി സഹകരിച്ച് സംഘടിപ്പിച്ച ‘ഫ്യൂഷൻ സ്റ്റുഡന്റ്സ് ക്യാമ്പ്’ ശ്രദ്ധേയമായി.
സുലൈമാൻ മേല്പത്തൂർ റമദാൻ പ്രഭാഷണവും ഡോ. അനിൽ മുഹമ്മദ് മുഖ്യപ്രഭാഷണവും നടത്തി. എഐകെഎംസിസി ബംഗളൂരു പ്രസിഡന്റ് ടി. ഉസ്മാൻ അധ്യക്ഷത വഹിച്ച ചടങ്ങിൽ ജനറൽ സെക്രട്ടറി എം.കെ. നൗഷാദ് സ്വാഗതവും സെക്രട്ടറി ഡോ. എം.എ. അമീറലി നന്ദിയും രേഖപ്പെടുത്തി.
SUMMARY: All India KMCC Bengaluru Central Committee ‘Grand Iftar Gathering’
