കൊച്ചി: തൊണ്ടിമുതല് തിരിമറി കേസില് മുൻ മന്ത്രി ആന്റണി രാജുവിന് ഹൈക്കോടതിയില് നിന്ന് കനത്ത തിരിച്ചടി. കേസില് താൻ കുറ്റക്കാരനാണെന്ന തിരുവനന്തപുരം സെഷൻസ് കോടതിയുടെ വിധി മരവിപ്പിക്കണമെന്ന അദ്ദേഹത്തിന്റെ ആവശ്യം ഹൈക്കോടതി അംഗീകരിച്ചില്ല. കോടതി വിധി മരവിപ്പിക്കാത്ത സാഹചര്യത്തില് ആന്റണി രാജുവിന് വരാനിരിക്കുന്ന തിരഞ്ഞെടുപ്പില് മത്സരിക്കാൻ സാധിക്കില്ല.
ജുഡീഷ്യറിയുടെ അന്തസ്സ് ഉയർത്തിപ്പിടിക്കേണ്ടവർ തന്നെ നീതിന്യായ വ്യവസ്ഥയെ അട്ടിമറിക്കാൻ ശ്രമിച്ചുവെന്ന ഗൗരവകരമായ നിരീക്ഷണത്തോടെയാണ് കോടതി നടപടി. 1990-ല് തിരുവനന്തപുരം വിമാനത്താവളത്തില് ലഹരിമരുന്ന് കേസില് പിടിയിലായ ഓസ്ട്രേലിയൻ പൗരൻ ആൻഡ്രൂ സാല്വദോർ സർവലിയെ ശിക്ഷയില് നിന്ന് രക്ഷിക്കാൻ തൊണ്ടിമുതലായ അടിവസ്ത്രത്തില് കൃത്രിമം കാണിച്ചുവെന്നതാണ് ആന്റണി രാജുവിനെതിരെയുള്ള കേസ്.
അന്ന് ജൂനിയർ അഭിഭാഷകനായിരുന്ന ആന്റണി രാജുവും കോടതിയിലെ ക്ലർക്കായിരുന്ന കെ.എസ്. ജോസും ചേർന്ന് പ്രധാന തൊണ്ടിമുതലില് മാറ്റം വരുത്തിയെന്ന് കോടതി കണ്ടെത്തിയിരുന്നു. ഈ കേസില് ഇക്കഴിഞ്ഞ ജനുവരി മൂന്നിനാണ് ആന്റണി രാജുവിന് മൂന്ന് വർഷം തടവും പതിനായിരം രൂപ പിഴയും ശിക്ഷ വിധിച്ചത്.
നീതിയുടെ ഗതിയെ ബോധപൂർവ്വം തടസ്സപ്പെടുത്താനുള്ള ആസൂത്രിത നീക്കമാണ് നടന്നതെന്നും ഇത് വെറുമൊരു ക്രമക്കേടല്ലെന്നും വിധിപ്പകർപ്പില് കോടതി ചൂണ്ടിക്കാട്ടിയിരുന്നു. അന്ന് നീതിന്യായ വ്യവസ്ഥ പരാജയപ്പെട്ടുവെന്നും അത്തരമൊരു കുറ്റകൃത്യത്തില് ശിക്ഷാ നടപടികള് മരവിപ്പിക്കാൻ കഴിയില്ലെന്നുമാണ് ഹൈക്കോടതിയുടെ നിലപാട്. തിരഞ്ഞെടുപ്പ് അടുത്തിരിക്കുന്ന സാഹചര്യത്തില് ഈ കോടതി വിധി ആന്റണി രാജുവിനും അദ്ദേഹത്തിന്റെ രാഷ്ട്രീയ പാർട്ടിക്കും വലിയ തിരിച്ചടിയാണ് നല്കിയിരിക്കുന്നത്.
SUMMARY: Setback for Antony Raju in Thondimala case; High Court rejects request to freeze sentence
WhatsApp
Telegram
