ബിഎംടിസിയുടെ വജ്ര വിസ്താര എസി ബസ് ഇനി ചന്നപട്ടണയിലേക്കും

ബെംഗളൂരു: ബാംഗ്ലൂര്‍ മെട്രോപൊളിറ്റന്‍ ട്രാന്‍സ്‌പോര്‍ട്ട് കോര്‍പറേഷന്‍ (ബിഎംടിസി) വജ്ര വിസ്താര എ.സി ബസ് ചന്നപട്ടണയിലേക്കും സര്‍വിസ് ആരംഭിച്ചു. കോണ്‍ഗ്രസ് എം.എല്‍.എ സി.പി. യോഗേശ്വര്‍, മുന്‍ എം.പി ഡി.കെ. സുരേഷ്, ഗതാഗത ഉദ്യോഗസ്ഥര്‍ എന്നിവര്‍ വെള്ളിയാഴ്ച സര്‍വിസ് ഫ്‌ലാഗ് ഓഫ് ചെയ്തു. മെജസ്റ്റിക്കില്‍നിന്ന് 60 കിലോമീറ്റര്‍ ദൂരത്തേക്കുള്ള ബിഎംടിസിയുടെ ഏറ്റവും ദൈര്‍ഘ്യമേറിയ സര്‍വീസാണിത്.

ബെംഗളൂരു-മൈസൂരു ആക്‌സസ്-കണ്‍ട്രോള്‍ഡ് എക്‌സ്പ്രസ് ഹൈവേയിലൂടെയാണ് ബസുകള്‍ സര്‍വിസ് നടത്തുന്നത്. 10 എയര്‍ കണ്ടീഷന്‍ ചെയ്ത ബസുകളാണ് സര്‍വീസ് നടത്തുക. രാവിലെ മുതല്‍ വൈകുന്നേരം വരെ ഓരോ അരമണിക്കൂര്‍ ഇടവിട്ട് ദിവസവും 44 സര്‍വിസുകള്‍ നടത്തും. ടോള്‍ ഉള്‍പ്പെടെ 105 രൂപയാണു ടിക്കറ്റ് നിരക്ക്. പ്രതിദിന പാസ് 180 രൂപയും പ്രതിവാര പാസ് 1,000 രൂപയും പ്രതിമാസ പാസ് 2,700 രൂപയുമാണ്.

നേരത്തെ രാമനഗര, കനക്പുര ചിക്കബെല്ലാപുര എന്നിവിടങ്ങളിലേക്കും ബിഎംടിസി എസി ബസ് സര്‍വീസ് തുടങ്ങിയിരുന്നു. നേരത്തെ 40 കിലോമീറ്റര്‍ പരിധിയിലാണു ബിഎംടിസി സര്‍വീസ് നടത്തിയിരുന്നത്. അയല്‍ ജില്ലകളിലേക്കു സര്‍വീസ് നടത്താന്‍ കര്‍ണാടക ആര്‍ടിസി അനുമതി നല്‍കിയതോടെയാണു വജ്ര വിസ്താര എന്ന പേരില്‍ ബിഎംടിസി സര്‍വീസ് ആരംഭിച്ചത്.
SUMMARY: BMTC’s Vajra Vistara AC bus will now run to Channapatna