തിരുവനന്തപുരം: ഷാർജയില് ആത്മഹത്യ ചെയ്ത അതുല്യയുടെ മൃതദേഹം നാട്ടിലെത്തിച്ചു. പുലർച്ചെ 4. 30 ഓടെയാണ് മൃതദേഹം തിരുവനന്തപുരം വിമാനത്താവളത്തില് എത്തിച്ചത്. 9 മണിയോടെ കൊല്ലം പാരിപ്പള്ളി മെഡിക്കല് കോളേജില് മൃതദേഹം എത്തിച്ചു. റീ പോസ്റ്റ്മോര്ട്ടം നടത്താനാണ് തീരുമാനം. പോസ്റ്റ്മോര്ട്ടം പൂര്ത്തിയായാല് മൃതദേഹം കൊല്ലത്തെ അതുല്യയുടെ വീട്ടിലേക്ക് കൊണ്ടുപോകും. വൈകിട്ടോടെ വീട്ടുവളപ്പിലാണ് സംസ്കാരം.
ഇതിന് മുമ്പ് ഷാർജയില് വെച്ച് പോസ്റ്റ്മോര്ട്ടം നടന്നിരുന്നു. അതില് ആത്മഹത്യയാണ് എന്നാണ് റിപ്പോർട്ട്. എന്നാല് ഇതില് വിശ്വാസമില്ല എന്നാണ് കുടുംബത്തിന്റെ ആരോപണം. അതുല്യയെ ഭര്ത്താവ് സതീഷ് കൊലപ്പെടുത്തിയതാണെന്ന ആരോപണത്തില് കുടുംബം ഇപ്പോഴും ഉറച്ച് നില്ക്കുകയാണ്. ഇതേ തുടർന്നാണ് റീ പോസ്റ്റുമോർട്ടം നടത്തുന്നത്. ഇക്കഴിഞ്ഞ ജൂലൈ 19നാണ് അതുല്യയെ ഷാര്ജയിലെ ഫ്ളാറ്റില് തൂങ്ങിമരിച്ച നിലയില് കണ്ടെത്തുന്നത്.
ഇതിന് പിന്നാലെ അതുല്യയെ ഭര്ത്താവ് സതീഷ് ശങ്കര് ഉപദ്രവിക്കുന്നതിന്റെ ദൃശ്യങ്ങള് പുറത്തുവന്നിരുന്നു. അതുല്യയുടെ ശരീരത്തില് മര്ദ്ദനമേറ്റതിന്റെ വീഡിയോകളും പുറത്തുവന്നിരുന്നു. അതുല്യ, സതീഷില് നിന്ന് ക്രൂരമായ പീഡനം നേരിട്ടിരുന്നുവെന്നും അതുല്യയെ സതീഷ് കൊലപ്പെടുത്തിയതാണെന്നുമുള്ള ആരോപണവുമായി കുടുംബവും രംഗത്ത് വന്നു.
SUMMARY: Body of Atulya, who committed suicide in Sharjah, brought home; funeral to be held in the evening
