ബെംഗളൂരു: നഗരത്തിലെ കൊടിഗേഹള്ളിയിൽ തെരുവ്നായ് ആക്രമണത്തിൽ വയോധികൻ മരിച്ചു. സീതപ്പയെ (68) ആണ് തിങ്കളാഴ്ച രാവിലെ മരിച്ച നിലയിൽ കണ്ടെത്തിയത്.
പുലർച്ചെ 3 മണിയോടെ 8 തെരുവ് നായകളുടെ സംഘം സീതപ്പയെ ആക്രമിച്ചു കൊലപ്പെടുത്തിയതാകാമെന്നാണ് സംശയം. രാത്രി ഉറക്കം വരാത്ത സീതപ്പ നടക്കാനിറങ്ങുകയായിരുന്നുവെന്ന് കുടുംബം വ്യക്തമാക്കുന്നു. സീതപ്പയുടെയും നായ്ക്കളുടെയും ശബ്ദം കേട്ടാണ് കുടുംബാംഗങ്ങൾ വീടിനു പുറത്തിറങ്ങിയത്. നായ്ക്കളെ ഓടിച്ചതിനു പിന്നാലെ ഇവർ പൊലീസിനെ വിവരം അറിയിച്ചു. തുടർന്ന് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ക്ഷീരകർഷകനായ സീതപ്പ വീടുകളിൽ പാൽ വിൽപന നടത്തിയാണ് ജീവിച്ചിരുന്നത്.
എന്നാൽ സിസിടിവി ക്യാമറകൾ ഇല്ലാത്ത സ്ഥലത്താണ് സംഭവം നടന്നതെന്നും പോസ്റ്റ്മോർട്ടം റിപ്പോർട്ട് ലഭിച്ചതിനു ശേഷമേ അന്തിമ നിഗമനത്തിൽ എത്തിച്ചേരാനാകൂവെന്നും ബിബിഎംപി അറിയിച്ചു. പ്രദേശത്ത് 16 നായകളെ കണ്ടെത്തിയിട്ടുണ്ടെന്നും ഇവ നിരീക്ഷണത്തിലാണെന്നും അധികൃതർ വ്യക്തമാക്കി. പ്രദേശത്ത് തെരുവ് നായ് ആക്രമണം പതിവാണെന്ന് നാട്ടുകാർ ചൂണ്ടിക്കാട്ടുന്നു.
SUMMARY: Senior citizen was killed in a stray dog attack in Bengaluru.
