ബെംഗളുരു: കർണാടക നിയമസഭ കൗൺസിൽ സീറ്റുകളിലേക്ക് നടന്ന തിരഞ്ഞെടുപ്പിൽ ആകെയുള്ള ഏഴ് സീറ്റുകളിൽ അഞ്ച് സീറ്റുകളിലും ജയിച്ച് കോൺഗ്രസ്. കോൺഗ്രസിന്റെ സ്ഥാനാർത്ഥികൾ എല്ലാവരും ജയിച്ചു. ബാക്കിയുള്ള രണ്ട് സീറ്റുകളില് ബിജെപി സ്ഥാനാര്ത്ഥികള് വിജയിച്ചു. കോൺഗ്രസ് സ്ഥാനാർത്ഥികൾക്ക് പ്രതീക്ഷിച്ചതിലും കൂടുതൽ വോട്ടുകൾ ലഭിച്ചതിനാൽ ബിജെപി, ജെഡി (എസ്) എംഎൽഎമാരിൽ നിന്ന് ക്രോസ് വോട്ടിംഗ് നടന്നതായാണ് വിവരം.
ബി കെ ഹരിപ്രസാദ്, തിപ്പണ്ണപ്പ കാമകനൂര്, പി വി മോഹന്, ശിവണ്ണ ബി എസ് വിനയ് കാര്ത്തിക് പ്രകാശ് എന്നിവരാണ് വിജയിച്ച കോണ്ഗ്രസ് സ്ഥാനാര്ത്ഥികള്. ബിജെപിയുടെ ലിംഗരാജ് പാട്ടീലും രഘു ആറും സീറ്റുകള് നിലനിര്ത്തിയപ്പോള് ജെഡിഎസ് (ജനതാദള്-സെക്കുലര്) സ്ഥാനാര്ത്ഥി ഗോവിന്ദരാജു പരാജയപ്പെട്ടു.
ഗംഭീര വിജയത്തോടെ 75 അംഗങ്ങളുള്ള ഉപരിസഭയിൽ കോൺഗ്രസിന്റെ ആകെ സീറ്റുകളുടെ എണ്ണം 39 ആയി ഉയർന്നു. നിലവിൽ ബിജെപിക്ക് 29 അംഗങ്ങളും ജെഡിഎസിന് ആറ് അംഗങ്ങളുമുണ്ട്. ഒരു സ്വതന്ത്ര അംഗവും കൗൺസിലിലുണ്ട്. തെരഞ്ഞെടുപ്പിൽ ജെഡിഎസ് കനത്ത തിരിച്ചടിയാണ് നേരിട്ടത്. കൗൺസിലിലെ ഏഴാമത്തെ സീറ്റിനായി നടന്ന ശക്തമായ പോരാട്ടത്തിൽ ജെഡിഎസിന്റെ ഗോവിന്ദരാജു പരാജയപ്പെടുകയും കോൺഗ്രസ് അഞ്ചാം സീറ്റ് ഉറപ്പിക്കുകയുമായിരുന്നു. മുൻപ് ഈ ഏഴ് സീറ്റുകളിൽ നാലെണ്ണം കോൺഗ്രസിനും രണ്ടെണ്ണം ബിജെപിക്കും ഒരെണ്ണം ജെഡിഎസിനുമായിരുന്നു.
രഹസ്യ ബാലറ്റിലൂടെ നടന്ന വോട്ടെടുപ്പിൽ പ്രതിപക്ഷ നിരയിൽ നിന്ന് വ്യാപകമായ ക്രോസ് വോട്ടിംഗ് (Cross-voting) ഉണ്ടായതാണ് കോൺഗ്രസിന് അപ്രതീക്ഷിതമായി അഞ്ചാം സീറ്റ് സമ്മാനിച്ചതും ജെ.ഡി.എസിനെ തകർത്തതും. ബി.ജെ.പിയിൽ നിന്ന് 3 എം.എൽ.എമാരും, ജെ.ഡി.എസിൽ നിന്ന് 7 എം.എൽ.എമാരും പാർട്ടി വിപ്പ് ലംഘിച്ച് കോൺഗ്രസ് സ്ഥാനാർത്ഥികൾക്ക് വോട്ട് ചെയ്തതായാണ് പുറത്തുവരുന്ന രാഷ്ട്രീയ കണക്കുകൾ വ്യക്തമാക്കുന്നത്. 135 എം.എൽ.എമാരുള്ള കോൺഗ്രസിന് സഖ്യകക്ഷികളുടെയും സ്വതന്ത്രരുടെയും ക്രോസ് വോട്ടിംഗിന്റെയും പിൻബലത്തിൽ ആകെ 151 വോട്ടുകൾ ലഭിച്ചു.
വിജയം ഉറപ്പാക്കാൻ ഓരോ സ്ഥാനാർത്ഥിക്കും കുറഞ്ഞത് 28 ഒന്നാം മുൻഗണനാ വോട്ടുകൾ വീതമാണ് വേണ്ടിയിരുന്നത്. എന്നാൽ ജെ.ഡി.എസ് സ്ഥാനാർത്ഥി ഗോവിന്ദരാജുവിന് വെറും 14 വോട്ടുകൾ മാത്രമാണ് ലഭിച്ചത്. കോൺഗ്രസ് നിരയിൽ നിന്നും മുതിർന്ന നേതാക്കളായ ബി.കെ. ഹരിപ്രസാദ് (30 വോട്ട്), തിപ്പണ്ണപ്പ കാമകനൂർ (30 വോട്ട്), പി.വി. മോഹൻ (29 വോട്ട്), ശിവണ്ണ മലവള്ളി (30 വോട്ട്), വിനയ് കാർത്തിക് (32 വോട്ട്) എന്നിവരാണ് മികച്ച വിജയം നേടിയത്. ബി.ജെ.പി സ്ഥാനാർത്ഥികളായ ലിംഗരാജ് പാട്ടീലും (27 വോട്ട്), രഘു കൗട്ടില്യയും (29 വോട്ട്) തങ്ങളുടെ സീറ്റുകൾ നിലനിർത്തി.
കർണാടക മുഖ്യമന്ത്രിയായി ഡി കെ ശിവകുമാർ ചുമതലയേറ്റ ശേഷമുള്ള ആദ്യത്തെ തിരഞ്ഞെടുപ്പ് പരീക്ഷണം കൂടിയായിരുന്നു ഇത്. കോൺഗ്രസ് നേതാക്കളായ നസീർ അഹമ്മദ്, ടിപ്പണ്ണപ്പ, ബി കെ ഹരിപ്രസാദ്, ബിജെപി നേതാക്കളായ എൻ നാഗരാജു (എംടിബി), പ്രതാപ് സിംഹ നായക് കെ, സുനിൽ വല്ല്യാപൂർ; ജെഡി (എസ്) യിലെ ഗോവിന്ദരാജു എന്നിവർ ജൂൺ 30 ന് വിരമിക്കുന്നതോടെ കാലാവധി അവസാനിക്കാനിരിക്കെയാണ് തിരഞ്ഞെടുപ്പ് നടന്നത്.
SUMMARY: Congress wins five out of seven seats in Karnataka Legislative Council elections, supported by expelled BJP MLAs and independents
