ഗ്ലാസ്കോ: കോമണ്വെല്ത്ത് ഗെയിംസിന്റെ പത്താം ദിനത്തില് ബോക്സിങ് റിങ്ങില് ഇന്ത്യയ്ക്ക് ഇരട്ട സ്വർണം. വനിതകളുടെ 54 കിലോഗ്രാം വിഭാഗത്തില് പ്രീതി പവാറും 57 കിലോഗ്രാം വിഭാഗത്തില് ജെയ്സ്മിൻ ലംബോറിയയും സ്വർണം സ്വന്തമാക്കി. ഫൈനലില് ഇരുവരും ഏകപക്ഷീയമായ വിജയമാണ് നേടിയത്.
54 കിലോഗ്രാം വിഭാഗം ഫൈനലില് കാനഡയുടെ സ്കാർലെറ്റ് ഡെല്ഗാഡോയെ നേരിട്ട പ്രീതി, തുടക്കം മുതല് ആക്രമണോത്സുക പ്രകടനമാണ് പുറത്തെടുത്തത്. എതിരാളിയുടെ പ്രതിരോധത്തെ കൃത്യമായ പഞ്ചുകളിലൂടെ മറികടന്ന പ്രീതി 5-0ന്റെ ഏകകണ്ഠമായ വിധിയിലൂടെ സ്വർണം ഉറപ്പിച്ചു. 57 കിലോഗ്രാം വിഭാഗം ഫൈനലില് വടക്കൻ അയർലൻഡിന്റെ മിഷേല് വാല്ഷിനെതിരെയായിരുന്നു ജെയ്സ്മിന്റെ പോരാട്ടം.
റിങ്ങില് വ്യക്തമായ ആധിപത്യം പുലർത്തിയ ജെയ്സ്മിൻ 5-0ന് വിജയിച്ച് ഇന്ത്യയുടെ രണ്ടാമത്തെ ബോക്സിങ് സ്വർണം സ്വന്തമാക്കി. അതേസമയം, പുരുഷൻമാരുടെ ട്രിപ്പിള് ജംപിലും ഇന്ത്യയ്ക്ക് ഇരട്ട മെഡല് ലഭിച്ചു. പ്രവീണ് ചിത്രവേല് 16.58 മീറ്റർ ചാടി വെള്ളി മെഡല് നേടിയപ്പോള്, പ്രഭു തിരുമാരൻ 16.52 മീറ്റർ ദൂരം താണ്ടി വെങ്കലം സ്വന്തമാക്കി.
ഇന്ന് രണ്ട് സ്വർണം കൂടി നേടിയതോടെ കോമണ്വെല്ത്ത് ഗെയിംസില് ഇന്ത്യയുടെ ആകെ സ്വർണനേട്ടം ഏഴായി. നിലവില് ഏഴ് സ്വർണം, 13 വെള്ളി, ഏഴ് വെങ്കലം ഉള്പ്പെടെ 27 മെഡലുകളുമായി ഇന്ത്യ മെഡല്പ്പട്ടികയില് ആറാം സ്ഥാനത്താണ്. 56 സ്വർണം ഉള്പ്പെടെ 132 മെഡലുകളുമായി ഓസ്ട്രേലിയയാണ് പട്ടികയില് ഒന്നാമത്. 18 സ്വർണം ഉള്പ്പെടെ 82 മെഡലുകളുള്ള ഇംഗ്ലണ്ട് രണ്ടാം സ്ഥാനത്തും 17 സ്വർണവുമായി കാനഡ മൂന്നാം സ്ഥാനത്തുമാണ്. സ്കോട്ലൻഡും നൈജീരിയയും ഇന്ത്യയ്ക്ക് മുന്നിലുണ്ട്.
SUMMARY: India wins double gold in boxing; Preeti and Jaismine shine
