കൊച്ചി: നടി അന്സിബ ഹസനെ സമൂഹ മാധ്യമങ്ങളിലൂടെ അപകീർത്തിപ്പെടുത്തിയെന്ന പരാതിയില് ലക്ഷ്മി പ്രിയയ്ക്കെതിരെ കേസെടുക്കാന് കോടതിയുടെ നിര്ദേശം. പാലാരിവട്ടം പോലീസിനാണ് എറണാകുളം മജിസ്ട്രേറ്റ് കോടതി നിര്ദേശം നല്കിയിരിക്കുന്നത്. അന്സിബയുടെ സ്വകാര്യ അന്യായത്തിലാണ് കോടതി നടപടി. ലക്ഷ്മിപ്രിയയും യൂട്യൂബ് ചാനല് ഉടമയും നടി ശ്വേതാ മേനോനും ചേർന്നുള്ള ഗൂഢാലോചനയുടെ ഭാഗമായാണ് തനിക്കെതിരെ വ്യാജ പ്രചാരണം നടത്തുന്നതെന്നാണ് അൻസിബയുടെ ആരോപണം.
നേരത്തെ, അൻസിബയുടെ പരാതിയില് കേസെടുക്കേണ്ട കുറ്റകൃത്യങ്ങള് നിലനില്ക്കുന്നുണ്ടോ എന്ന് പരിശോധിക്കാനും തെളിവുകള് വിലയിരുത്താനും ഹൈക്കോടതി നിർദേശിച്ചിരുന്നു. യുട്യൂബ് വഴി നടത്തുന്ന അപവാദപ്രചാരണം തടയണമെന്ന് ആവശ്യപ്പെട്ട് മുൻപ് പാലാരിവട്ടം പോലീസിലും കൊച്ചി സിറ്റി പോലീസ് കമ്മിഷണർക്കും അൻസിബ പരാതി നല്കിയിരുന്നു.
അതിനു ശേഷം, നടപടിയുണ്ടായില്ലെന്ന് ആരോപിച്ച് എറണാകുളം മജിസ്ട്രേറ്റ് കോടതിയെ സമീപിച്ചെങ്കിലും എഫ്ഐആർ റജിസ്റ്റർ ചെയ്യാതെ സ്വകാര്യ പരാതിയായി പരിഗണിക്കാനാണ് കോടതി ഉത്തരവിട്ടത്. മജിസ്ട്രേറ്റ് കോടതിയുടെ ഈ ഉത്തരവ് റദ്ദാക്കണമെന്നും കേസെടുത്ത് അന്വേഷണത്തിന് ഉത്തരവിടണമെന്നും ആവശ്യപ്പെട്ടാണ് അൻസിബ ഹൈക്കോടതിയെ സമീപിച്ചത്. ഹൈക്കോടതി നിർദേശം അനുസരിച്ചാണ് മജിസ്ട്രേറ്റ് കോടതിയുടെ ഇപ്പോഴത്തെ നടപടി.
SUMMARY: Court orders case to be registered against actress Lakshmi Priya based on Ansiba Hassan’s complaint
