ബെംഗളൂരു: ബെംഗളൂരു-മൈസൂരു എക്സ്പ്രസ് പാതയിലെ രാമനഗരയില് ഗുഡ്സ് ടെമ്പോ മറിഞ്ഞ് മലയാളി യുവാവ് മരിച്ചു. മലപ്പുറം കൂട്ടിലങ്ങാടി സ്വദേശി അമീൻ ബാബു (28) ആണ് മരിച്ചത്. സുഹൃത്ത് മലപ്പുറം കിഴിശ്ശേരി സ്വദേശി ദിൽഷാദിന് (31) പരുക്കേറ്റു. വ്യാഴാഴ്ച രാവിലെ എട്ടരയോടെ മായകനഹള്ളിയിൽ വച്ചാണ് അപകടമുണ്ടായത്. ഗുഡ്സ് ടെമ്പോയിൽ നിലമ്പൂരിൽ നിന്നും ഫർണിച്ചറുമായി ബെംഗളൂരുവിലേക്ക് വരികയായിരുന്നു ഇരുവരും. നിയന്ത്രണം വിട്ട വാഹനം ഡിവൈഡറിലേക്ക് ഇടിച്ചുകയറുകയായിരുന്നു. അമീൻ ബാബു സംഭവസ്ഥലത്ത് വച്ച് തന്നെ മരണപ്പെട്ടു. പരുക്കേറ്റ ദിൽഷാദ് ബെംഗളൂരുവിലെ സ്വകാര്യ ആശുപത്രിയില് ചികിത്സയിലാണ്.
ഗുഡല്ലൂരിലാണ് ഏറെക്കാലമായി അമീൻ ബാബു താമസിക്കുന്നത്. ഹമീദ് -ഉമ്മു കുൽസു ദമ്പതികളുടെ മകനാണ്. സഹോദരങ്ങള്: ഹബീബ, ഫസീല.
എഐകെഎംസിസി മൈസൂരു റോഡ് ബിഡദി ഏരിയ കമ്മിറ്റി പ്രവർത്തകരുടെ സഹായത്തോടെ മൃതദേഹം പോസ്റ്റ്മോർട്ടം നടപടിക്രമങ്ങൾ പൂർത്തിയാക്കി നാട്ടിലേക്ക് കൊണ്ടുപോയി. സംസ്കാരം ഗുഡല്ലൂര് ജുമാമസ്ജിദില് നടന്നു.
SUMMARY: Road accident near Bengaluru; Malayali dies, friend injured
