ബെംഗളൂരു: സംസ്ഥാനത്ത് ഇത്തവണ തെക്കുപടിഞ്ഞാറൻ കാലവർഷം ദുർബലമായതോടെ കർണാടകയിലെ 158 താലൂക്കുകൾക്ക് വരൾച്ചാഭീഷണി നേരിടുന്നതായി ഉപമുഖ്യമന്ത്രി ഡി. കെ. ശിവകുമാർ അറിയിച്ചു. മഴക്കുറവ് മൂലമുള്ള സ്ഥിതിഗതികൾ വിലയിരുത്താൻ മുഖ്യമന്ത്രിയുടെ അധ്യക്ഷതയിൽ ചേർന്ന ഉന്നതതല യോഗത്തിന് ശേഷമാണ് അദ്ദേഹം ഇക്കാര്യം അറിയിച്ചത്.
സംസ്ഥാനത്ത് ഇതുവരെ ശരാശരി 39 ശതമാനം മഴക്കുറവ് രേഖപ്പെടുത്തിയിട്ടുണ്ടെന്നും, ചില മേഖലകളിൽ മഴ സാധാരണയേക്കാൾ 60 ശതമാനം വരെ കുറഞ്ഞതായും അദ്ദേഹം പറഞ്ഞു. ഇതിന്റെ ആഘാതം കൃഷി, കുടിവെള്ള വിതരണം, ജലസേചന പദ്ധതികൾ, അണക്കെട്ടുകളിലെ ജലസംഭരണം എന്നിവയിൽ പ്രകടമായിത്തുടങ്ങിയിട്ടുണ്ട്.
മഴക്കുറവിനെ തുടർന്ന് ഖരീഫ് കൃഷി സാരമായി ബാധിച്ചിരിക്കുകയാണ്. നിരവധി പ്രദേശങ്ങളിൽ വിത്തിറക്കൽ വൈകുകയും മഴയെ ആശ്രയിക്കുന്ന കർഷകർ പ്രതിസന്ധിയിലാകുകയും ചെയ്തിട്ടുണ്ട്. സംസ്ഥാനത്തെ പ്രധാന അണക്കെട്ടുകളിലെ ജലനിരപ്പും ഗണ്യമായി കുറഞ്ഞ സാഹചര്യത്തിൽ വരും മാസങ്ങളിലെ കുടിവെള്ള ലഭ്യതയെക്കുറിച്ചും സർക്കാർ ആശങ്ക പ്രകടിപ്പിച്ചു.
സ്ഥിതിഗതികൾ വിലയിരുത്താൻ കേന്ദ്ര സർക്കാർ ഉടൻ വിദഗ്ധസംഘത്തെ നിയോഗിക്കണമെന്ന് ആവശ്യപ്പെട്ട് പ്രധാനമന്ത്രി നരേന്ദ്ര മോദിക്ക് കത്തയച്ചതായി ഡി. കെ. ശിവകുമാർ അറിയിച്ചു. വരൾച്ചാ സാഹചര്യം നേരിടാൻ ആവശ്യമായ കേന്ദ്രസഹായവും അടിയന്തരമായി അനുവദിക്കണമെന്ന ആവശ്യവും കത്തിൽ ഉന്നയിച്ചിട്ടുണ്ട്.
കുടിവെള്ള ക്ഷാമം നേരിടാൻ എല്ലാ ജില്ലാ ഭരണകൂടങ്ങൾക്കും ജാഗ്രതാ നിർദേശം നൽകിയിട്ടുണ്ട്. ഓരോ താലൂക്കിനും ഒരു കോടി രൂപ വീതം അനുവദിച്ചിട്ടുണ്ടെന്നും ആവശ്യമായാൽ കൂടുതൽ ദുരിതാശ്വാസ നടപടികൾ സ്വീകരിക്കുമെന്നും അദ്ദേഹം വ്യക്തമാക്കി.
വരും ദിവസങ്ങളിലും കാര്യമായ മഴ ലഭിക്കാത്ത പക്ഷം സംസ്ഥാനത്ത് വരൾച്ചാ സാഹചര്യം കൂടുതൽ രൂക്ഷമാകുമെന്നും കാർഷിക മേഖലയെയും ജലവിഭവങ്ങളെയും സംരക്ഷിക്കാൻ എല്ലാ വകുപ്പുകളും ഏകോപിതമായി പ്രവർത്തിക്കുകയാണെന്നും ഡി. കെ. ശിവകുമാർ പറഞ്ഞു.
SUMMARY: Severe rainfall deficiency; 158 taluks in Karnataka at risk of drought
