ഹാസനിൽ നിന്ന് കാണാതായ സ്കൂൾ വിദ്യാർഥികളെ ബെംഗളൂരുവിൽ കണ്ടെത്തി

ബെംഗളൂരു: ഹാസനിൽ നിന്ന് കാണാതായ മൂന്ന് സ്കൂൾ വിദ്യാർഥികളെ ബെംഗളൂരുവിൽ കണ്ടെത്തി. ബുധനാഴ്ച രാവിലെ 7.30 ഓടെയാണ് സക്ലേഷ്പുർ താലൂക്കിലെ കുനിഗനഹള്ളിയിൽ നിന്ന് ശരത്, ധനഞ്ജയ, മുരളി എന്നീ മൂന്ന് കുട്ടികളെ കാണാതായത്. സ്കൂളിലേക്ക് പോയ കുട്ടികൾ പിന്നീട് വീട്ടിലേക്ക് തിരിച്ചെത്തിയിരുന്നില്ല. മൂവരും അഡാരവള്ളിയിലെ ഗവൺമെന്റ് ഹൈസ്‌കൂളിലെ പത്താം ക്ലാസ് വിദ്യാർഥികളാണ്.

രക്ഷിതാക്കളുടെ പരാതിയിൽ കേസെടുത്ത പോലീസ് സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് കുട്ടികളെ കണ്ടെത്തിയത്. ഹാസനിൽ നിന്ന് മൈസൂരുവിലേക്ക് പോയ കുട്ടികൾ ഇവിടെ നിന്നും ബെംഗളൂരുവിലേക്ക് എത്തുകയായിരുന്നു. ഇവർ എന്തിനാണ് വീടുവിട്ടു പോയതെന്ന കാര്യം വ്യക്തമല്ല. കുട്ടികളെ രക്ഷിതാക്കളെ തിരിച്ചേൽപ്പിച്ചതായി പോലീസ് പറഞ്ഞു. സംഭവത്തിൽ അന്വേഷണം പുരോഗമിക്കുകയാണ്.

TAGS: BENGALURU | MISSING
SUMMARY: Three Class 10 boys missing from Sakleshpur village found in B’luru