ബെംഗളൂരു: കനത്ത മഴ തുടരുന്നതിനിടെ ശിവമൊഗ്ഗ ജില്ലയിലെ തുംഗ, ഭദ്ര, ശാരാവതി നദികളിലെ ജലനിരപ്പ് ഗണ്യമായി ഉയർന്നു. തുംഗ, ഭദ്ര നദികൾ കരകവിഞ്ഞൊഴുകുന്ന സാഹചര്യത്തിൽ താഴ്ന്ന പ്രദേശങ്ങളിൽ വെള്ളപ്പൊക്ക ഭീഷണി നിലനിൽക്കുന്നതായി ജില്ലാ ഭരണകൂടം മുന്നറിയിപ്പ് നൽകി. അണക്കെട്ടുകളിലേക്കുള്ള നീരൊഴുക്കും കുത്തനെ വർധിച്ചിരിക്കുകയാണ്.
കഴിഞ്ഞ കുറച്ച് ദിവസങ്ങളായി മലയോര മേഖലയിലുടനീളം പെയ്യുന്ന കനത്ത മഴയെ തുടർന്ന് തുംഗ, ഭദ്ര അണക്കെട്ടുകളിലേക്കുള്ള ജലവരവ് വലിയ തോതിൽ ഉയർന്നു. ജലനിരപ്പ് ഉയരുന്ന സാഹചര്യത്തിൽ അണക്കെട്ടുകളുടെ സ്ഥിതി നിരന്തരം നിരീക്ഷിച്ചുവരികയാണെന്നും ആവശ്യമെങ്കിൽ അധിക വെള്ളം പുറത്തേക്ക് ഒഴുക്കാനുള്ള നടപടികൾ സ്വീകരിക്കുമെന്നും ജലസേചന വകുപ്പ് അറിയിച്ചു.
ശിവമൊഗ്ഗ നഗരത്തിലും തീർത്ഥഹള്ളി, സാഗർ, ഹൊസനഗര, ഭദ്രാവതി താലൂക്കുകളിലും ശക്തമായ മഴ തുടരുകയാണ്. പല താഴ്ന്ന പ്രദേശങ്ങളിലും വെള്ളം കയറിയതോടെ ജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.
നദീതീരങ്ങളിൽ താമസിക്കുന്നവർ അനാവശ്യമായി നദിയിലിറങ്ങരുതെന്നും കുട്ടികളെ ജലാശയങ്ങൾക്കരികിലേക്ക് വിടരുതെന്നും മുന്നറിയിപ്പുണ്ട്.
കനത്ത മഴയെ തുടർന്ന് ജില്ലയിൽ നിരവധി മരങ്ങൾ കടപുഴകുകയും വൈദ്യുതി തൂണുകൾ തകരുകയും ചെയ്തിട്ടുണ്ട്. ചില ഗ്രാമങ്ങളിലേക്കുള്ള റോഡുകളിൽ വെള്ളം കയറിയതിനാൽ ഗതാഗതം ഭാഗികമായി തടസ്സപ്പെട്ടു. മലയോര മേഖലകളിൽ മണ്ണിടിച്ചിലിനും സാധ്യതയുള്ളതിനാൽ ഘട്ട് റോഡുകളിലൂടെയുള്ള യാത്രകൾ അതീവ ജാഗ്രതയോടെയോ പരമാവധി ഒഴിവാക്കിയോ വേണമെന്ന് ദുരന്തനിവാരണ അധികൃതർ അറിയിച്ചു.
ഇതിനിടെ, ശിവമൊഗ്ഗയിൽ കനത്ത മഴയെ തുടർന്ന് മതിൽ തകർന്ന് മൂന്ന് പേർ മരിച്ച സംഭവം മഴക്കാല അപകടസാധ്യതയുടെ ഗൗരവം വീണ്ടും ഉയർത്തിക്കാട്ടുകയാണ്. അടുത്ത ദിവസങ്ങളിലും ശക്തമായ മഴ തുടരുമെന്ന കാലാവസ്ഥാ വകുപ്പിന്റെ മുന്നറിയിപ്പിനെ തുടർന്ന് ജില്ലാ ഭരണകൂടം ജാഗ്രത ശക്തമാക്കിയിട്ടുണ്ട്.
SUMMARY:Tunga and Bhadra rivers overflow in Shivamogga; Flood threat in low-lying areas
