ബെംഗളൂരു: കർണാടകയിലെ കുടക് സന്ദര്‍ശിക്കാനെത്തിയ അമേരിക്കൻ സ്വദേശിനിയായ വിനോദസഞ്ചാരിയെ ബലാത്സംഗം ചെയ്തതായി പരാതി. വാഷിങ്ടണിൽനിന്നുള്ള യുവതിയാണ് ക്രൂര ആക്രമണത്തിനു ഇരയായത്. സംഭവത്തിൽ രണ്ടുപേരെ പോലീസ് അറസ്റ്റ് ചെയ്തു. ഹോംസ്റ്റേ ജീവനക്കാരൻ ഝാർഖണ്ഡ് സ്വദേശിയെയും സ്ഥാപന ഉടമയുമാണ് അറസ്റ്റിലായത്.
വിനോദസഞ്ചാര കേന്ദ്രത്തിലെ ഹോംസ്റ്റേയിലെ മുറിക്കുള്ളിൽ വെച്ചാണ് പ്രതി സ്ത്രീയെ ആക്രമിച്ചതെന്ന് പോലീസ് പറഞ്ഞു. ആക്രമണത്തിന് ഇരയായ സ്ത്രീക്ക് ഹോംസ്റ്റേ ഉടമ യാതൊരു വിധ സഹായവും നൽകിയിരുന്നില്ല. കൂടാതെ അയാൾ അമേരിക്കൻ ടൂറിസ്റ്റിനെ മൂന്ന് ദിവസത്തേക്ക് തടഞ്ഞുവെക്കുകയും അവരുടെ മൊബൈൽ ഫോൺ പിടിച്ചുവാങ്ങുകയും പരാതി നൽകുന്നത് തടയുന്നതിനായി ഭീഷണിപ്പെടുത്തുകയും ചെയ്തു.
പീഡനത്തിന് ശേഷം മൈസൂരുവിലെത്തിയ യുവതി അമേരിക്കൻ എംബസിയെ വിവരമറിയിച്ചതോടെയാണ് വിവരം പുറംലോകമറിയുന്നത്. എംബസി നൽകിയ നിർദ്ദേശപ്രകാരം കർണാടക പോലീസ് ഉടൻ നടപടി സ്വീകരിക്കുകയും ഹോംസ്റ്റേ ഉടമയെയും ജീവനക്കാരനെയും അറസ്റ്റ് ചെയ്യുകയും ചെയ്തു. നിലവിൽ കേസ് രജിസ്റ്റർ ചെയ്ത പോലീസ് പ്രതികളെ മെയ് 3 വരെ ജുഡീഷ്യൽ കസ്റ്റഡിയിൽ വിട്ടിരിക്കുകയാണ്. വിദേശ സഞ്ചാരികളുടെ സുരക്ഷയെ സംബന്ധിച്ച് വലിയ ആശങ്കകൾ ഉയർത്തുന്ന ഈ സംഭവത്തിൽ കർശനമായ അന്വേഷണം നടന്നുവരികയാണെന്ന് കുടക് പോലീസ് സൂപ്രണ്ട് അറിയിച്ചു.
SUMMARY: US tourist raped in Kodagu. Homestay owner and employee arrested
