ബെംഗളൂരു: കർണാടകയിൽ കനത്ത മഴ തുടരുന്ന സാഹചര്യത്തിൽ കാലാവസ്ഥാ നിരീക്ഷണ കേന്ദ്രം (ഐഎംഡി) വിവിധ ജില്ലകളിൽ മഴ മുന്നറിയിപ്പ് നൽകിയിട്ടുണ്ട്. അടുത്ത 24 മണിക്കൂറിനുള്ളിൽ ദക്ഷിണ കന്നഡ ജില്ലയിലും, കുടകിലും റെഡ് അലർട്ട് പ്രഖ്യാപിച്ചതായി ഐഎംഡി അറിയിച്ചു. ഉഡുപ്പി, ഉത്തര കന്നഡ ജില്ലകളിൽ രണ്ട് ദിവസത്തേക്ക് ഓറഞ്ച് അലർട്ടും, ശിവമോഗയിൽ രണ്ട് ദിവസത്തേക്ക് യെല്ലോ അലർട്ടും പ്രഖ്യാപിച്ചിട്ടുണ്ട്.
ചിക്കമഗളൂരു ജില്ലയിൽ മൂന്ന് ദിവസത്തെ യെല്ലോ അലർട്ട് പ്രഖ്യാപിച്ചിട്ടുണ്ട്. ഹാസൻ ജില്ലയിൽ ഓറഞ്ച് അലർട്ടും യെല്ലോ അലർട്ടും. കൂടാതെ, വടക്കൻ കർണാടകയിലെ ബെലഗാവി ജില്ലയിൽ രണ്ട് ദിവസത്തെ യെല്ലോ അലർട്ട് പ്രഖ്യാപിച്ചിട്ടുണ്ട്. ദക്ഷിണ കന്നഡ ജില്ലയിൽ കനത്ത മഴയ്ക്കും മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ കാറ്റ് വീശാനും സാധ്യതയുണ്ട്. ഉഡുപ്പി, ഉത്തര കന്നഡ ജില്ലകളിൽ തുടർച്ചയായ കാറ്റിനൊപ്പം കനത്ത മഴയുണ്ടാകും.
ചിക്കമഗളൂരു, ശിവമോഗ ജില്ലകളിലും ഒറ്റപ്പെട്ട ശക്തമായ മഴയ്ക്കാണ് സാധ്യത. ബെളഗാവി, കുടക് ജില്ലകളിലും ശക്തമായ മഴ ലഭിക്കും. തെക്കൻ ഉൾപ്രദേശങ്ങളിൽ പലയിടത്തും വടക്കൻ ജില്ലകളിലെ ചില സ്ഥലങ്ങളിലും നേരിയതോ മിതമായതോ ആയ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
TAGS: KARNATAKA | RAIN UPDATES
SUMMARY: IMD issues rain alert in several districts across Karnataka
WhatsApp
Telegram
