ബെംഗളൂരു: ഓൺലൈൻ വഴി സാരി വാങ്ങാൻ ശ്രമിച്ച ഐഎഎസ് ഉദ്യോഗസ്ഥയ്ക്ക് പണം നഷ്ടപ്പെട്ടു. സകല മിഷൻ ഡയറക്ടർ പല്ലവി ആകൃതിക്കാണ് പണം നഷ്ടമായത്. ഡിജിറ്റൽ പരസ്യം കണ്ടാണ് പല്ലവി സാരി ഓർഡർ ചെയ്തത്. എന്നാൽ പറഞ്ഞ ദിവസം കഴിഞ്ഞിട്ടും സാരി ലഭിക്കാത്തതിനെ തുടർന്ന് പല്ലവി ഇവരെ ബന്ധപ്പെടാൻ ശ്രമിച്ചെങ്കിലും സാധിച്ചില്ല. ഇതോടെ ബെംഗളൂരു സൈബർ ക്രൈം സെല്ലിൽ ഇവർ പരാതി നോക്കുകയായിരുന്നു.
തമിഴ്നാട്ടിലെ മധുര സുങ്കുടിയിൽ നിന്നുള്ള കോട്ടൺ സാരികൾ വിൽക്കുന്ന പൂർണിമ കളക്ഷനിൽ നിന്നാണ് പല്ലവി സാരി ബുക്ക് ചെയ്തത്. മാർച്ച് 10 ന് ഗൂഗിൾ പേ വഴി സാരിക്ക് 850 രൂപയും ഇവർ നൽകിയിരുന്നു. പിന്നീട് ഏപ്രിൽ ആയിട്ടും സാരി ലഭിക്കാത്തതോടെയാണ് പല്ലവിക്ക് സംശയം തോന്നിയത്. പിന്നീട് പലതവണ ഇവരെ ബന്ധപ്പെടാൻ ശ്രമിച്ചെങ്കിലും കാര്യമുണ്ടായില്ല. ഓൺലൈൻ വീഡിയോകളിലൂടെ പ്രചരിക്കുന്ന ഇത്തരം വഞ്ചനാപരമായ പരസ്യങ്ങൾക്ക് ഇരയാകരുതെന്ന് സിറ്റി പോലീസ് കമ്മീഷണർ ബി. ദയാനന്ദ മുന്നറിയിപ്പ് നൽകി.
TAGS: KARNATAKA | CYBER CRIME
SUMMARY: IAS officer lost money in cyber crime
