ബെംഗളൂരു: മൂടൽമഞ്ഞ് കാരണം ചെന്നൈയിൽ ലാൻഡ് ചെയ്യേണ്ടിയിരുന്ന വിമാനങ്ങൾ ബെംഗളൂരുവിലേക്ക് തിരിച്ചുവിട്ടു. ക്വാലാലംപൂരിൽ നിന്നും ദുബായിൽ നിന്നും എത്തിയ വിമാനങ്ങളാണ് കെംപെഗൗഡ രാജ്യാന്തര വിമാനത്താവളത്തിലേക്ക് ബുധനാഴ്ച രാവിലെ തിരിച്ചുവിട്ടത്.
152 യാത്രക്കാരുമായി ക്വാലാലംപൂരിൽ നിന്നുള്ള എയർ ഏഷ്യ വിമാനം രാവിലെ 7.25ന് ചെന്നൈയിൽ ഇറങ്ങേണ്ടതായിരുന്നു. എന്നാൽ, കനത്ത മൂടൽമഞ്ഞ് കാരണം, ദൃശ്യപരത കുറവായതിനാൽ വിമാനം ബെംഗളൂരുവിലേക്ക് തിരിച്ചുവിട്ടു. ഇതോടെ ചെന്നൈയിലേക്കുള്ള യാത്രക്കാർ ബെംഗളൂരുവിൽ കുടുങ്ങി.
ചെന്നൈയിൽ നിന്ന് 8.05ന് ക്വാലാലംപൂരിലേക്ക് പറക്കേണ്ടിയിരുന്ന വിമാനം വ്യാഴാഴ്ച പുലർച്ചെ 12.15ന് ചെന്നൈയിൽ നിന്ന് പുറപ്പെടും. ക്വാലാലംപൂരിലേക്ക് പോകാനായി ബുധനാഴ്ച രാവിലെ വിമാനത്താവളത്തിലെത്തിയവരോട് മടങ്ങിപ്പോകാനായിരുന്നു നിർദേശം.
254 യാത്രക്കാരുമായി ദുബായിൽ നിന്നുള്ള എമിറേറ്റ്സ് വിമാനം രാവിലെ 8.15നാണ് ചെന്നൈയിൽ ലാൻഡ് ചെയ്യേണ്ടിയിരുന്നത്. പിന്നീട് ഉച്ചയ്ക്ക് 12.40 ഓടെ ബെംഗളൂരുവിൽ നിന്ന് ചെന്നൈയിലേക്ക് തിരിച്ച വിമാനം മൂന്ന് മണിക്കൂറിലധികം താമസിച്ചതിന് ശേഷം 1.20 ന് ദുബായിലേക്ക് പുറപ്പെട്ടു.
TAGS: BENGALURU | FLIGHTS DIVERTED
SUMMARY: Two international flights diverted from Chennai to Bengaluru due to fog
