ബെംഗളൂരു: കളിക്കുന്നതിനിടെ ഇരുമ്പ് ഗേറ്റ് ദേഹത്ത് വീണു ഏഴ് വയസുകാരിക്ക് ദാരുണാന്ത്യം. വ്യാഴാഴ്ച വൈകീട്ട് നെലമംഗല താലൂക്കിലെ വജ്രഹള്ളിയിലാണ് സംഭവം. റായ്ച്ചൂർ ദേവദുർഗ സ്വദേശിയായ മുക്കണ്ണയുടെയും ബാലമ്മയുടെയും മകളായ യെല്ലമ്മ ആണ് മരിച്ചത്. വ്യാഴാഴ്ച വൈകീട്ട് പെയ്ത കാറ്റിലും മഴയത്തും ഗേറ്റ് പെൺകുട്ടിയുടെ മേൽ ഇടിക്കുകയായിരുന്നു. കുട്ടി ഈ സമയം മഴയത്ത് കളിക്കുകയായിരുന്നു.
സംഭവത്തിൽ നെലമംഗല ടൗൺ പോലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ട്. അതേസമയം, ബിബിഎംപി പരിധിയിൽ വ്യാഴാഴ്ച വൈകിട്ട് പെയ്ത കനത്ത മഴയിൽ 171 മരങ്ങൾ കടപുഴകി വീണു. നഗരത്തിൽ 13 വരെ കാലാവസ്ഥ നിരീക്ഷണ വകുപ്പ് യെല്ലോ അലർട്ട് പ്രഖ്യാപിച്ചിട്ടുണ്ട്.
