ബെംഗളൂരു: ബെംഗളൂരുവിൽ ഓട്ടോ നിരക്ക് മാർച്ച് മുതൽ വർധിച്ചേക്കും. നിരക്ക് പരിഷ്കരണം ചർച്ച ചെയ്യുന്നതിനായി മാർച്ച് 12ന് ഓട്ടോറിക്ഷ യൂണിയനുകളുമായി യോഗം ചേരുമെന്ന് ഗതാഗത വകുപ്പ് അറിയിച്ചു. കഴിഞ്ഞ വർഷം മീറ്റർ നിരക്കുകൾ വർധിപ്പിക്കാൻ റീജിയണൽ ട്രാൻസ്‌പോർട്ട് അതോറിറ്റിയുടെ ചെയർമാനോട്‌ ഓട്ടോ ഡ്രൈവർമാരുടെ അസോസിയേഷനുകൾ അഭ്യർത്ഥിച്ചിരുന്നു. കൂടാതെ കിലോമീറ്ററിന് 5-10 രൂപ വരെ വർധനവ് വേണമെന്നായിരുന്നു ഇവരുടെ ആവശ്യം.
നഗരത്തെ ഏറ്റവും കുറഞ്ഞ ഓട്ടോ നിരക്ക് 30 രൂപയാണ് (ആദ്യത്തെ 2 കിലോമീറ്ററിന്). ഏറ്റവും കുറഞ്ഞ നിരക്ക് 40 രൂപയായി ഉയർത്താനാണ് അസോസിയേഷന്റെ ആവശ്യം. മാർച്ച് 12 ലെ യോഗത്തിൽ നിരക്ക് വർധനവ് സംബന്ധിച്ച് അന്തിമ തീരുമാനമെടുക്കും. അവസാനമായി ഓട്ടോ നിരക്ക് വർധിപ്പിച്ചത് 2021ലാണ്. ഓട്ടോറിക്ഷാ ഡ്രൈവേഴ്‌സ് യൂണിയൻ സെക്രട്ടറി, രാജാജിനഗർ, ജയനഗർ ആർടിഒകളിലെ ഉദ്യോഗസ്ഥർ, ലീഗൽ മെട്രോളജി വകുപ്പിലെ ഉദ്യോഗസ്ഥർ, ഉപഭോക്തൃ ഫോറത്തിൽ നിന്നുള്ള പ്രതിനിധി, ബെംഗളൂരുവിലെ എല്ലാ ഓട്ടോ അസോസിയേഷനുകളുടെയും നേതാക്കൾ എന്നിവർ യോഗത്തിൽ പങ്കെടുക്കും.
TAGS: BENGALURU | PRICE HIKE
SUMMARY: Auto fare in Bengaluru to get costly
