ബെംഗളൂരു: കാൽനടയാത്രക്കാർക്ക് സുരക്ഷിതമായ നടപ്പാതകൾ ഒരുക്കുന്നതിനായി ഗ്രേറ്റർ ബെംഗളൂരു അതോറിറ്റി നടപ്പാക്കുന്ന പ്രത്യേക ഫുട്പാത്ത് ശുചീകരണ യജ്ഞത്തിന്റെ ഭാഗമായി കഴിഞ്ഞ 10 ദിവസത്തിനിടെ 435 കിലോമീറ്റർ ഫുട്പാത്തുകൾ കൈയേറ്റങ്ങളിൽ നിന്ന് ഒഴിപ്പിച്ചതായി അധികൃതർ അറിയിച്ചു.
ജൂലൈ 1-ന് ആരംഭിച്ച പ്രത്യേക ഡ്രൈവിന്റെ ഭാഗമായി നഗരത്തിലെ പ്രധാന റോഡുകളിലും ഉപറോഡുകളിലും ഫുട്പാത്തുകൾ കൈയേറിയിരുന്ന അനധികൃത കച്ചവടങ്ങൾ, നിർമാണങ്ങൾ, പരസ്യബോർഡുകൾ, മറ്റ് തടസ്സങ്ങൾ എന്നിവ നീക്കം ചെയ്തു. മാർത്തഹള്ളി, വൈറ്റ്ഫീൽഡ്, രാജാജിനഗർ, ബസവനഗുടി, യെലഹങ്ക, ഹെബ്ബാൾ, കെ.ആർ.പുരം തുടങ്ങി നിരവധി മേഖലകളിലാണ് നടപടി നടന്നത്.
മുഖ്യമന്ത്രി ഡി.കെ. ശിവകുമാർ നേരത്തെ വ്യക്തമാക്കിയതുപോലെ, ഫുട്പാത്ത് ഒഴിപ്പിക്കൽ നടപടി തുടരുമെങ്കിലും നിയമാനുസൃതമായി ഉപജീവനം നടത്തുന്ന തെരുവ് കച്ചവടക്കാർക്ക് ബദൽ സ്ഥലങ്ങൾ കണ്ടെത്തി നൽകും. എന്നാൽ ഫുട്പാത്ത് കൈയേറി പൊതുജനങ്ങൾക്ക് ബുദ്ധിമുട്ടുണ്ടാക്കുന്നവർക്കെതിരെ നിയമനടപടി സ്വീകരിക്കുമെന്നും സർക്കാർ അറിയിച്ചു.
നഗരത്തിലെ എല്ലാ പ്രധാന ഫുട്പാത്തുകളും കാൽനടയാത്രക്കാർക്ക് സുരക്ഷിതമാക്കുകയെന്ന ലക്ഷ്യത്തോടെ വരും ദിവസങ്ങളിലും പ്രത്യേക പരിശോധനയും കൈയേറ്റം ഒഴിപ്പിക്കലും തുടരുമെന്ന് ഗ്രേറ്റർ ബെംഗളൂരു അതോറിറ്റി അറിയിച്ചു.
SUMMARY: 435 km of footpaths cleared of encroachments in Bengaluru in 10 days
