ന്യൂഡല്ഹി: ഇന്ത്യയെ ആഗോള ആര്ട്ടിഫിഷ്യല് ഇന്റലിജന്സ് ഹബ്ബാക്കി മാറ്റുക എന്ന ലക്ഷ്യത്തോടെ ‘എഐ മിഷന് 2.0’ പദ്ധതിയുമായി കേന്ദ്ര സര്ക്കാര്. കമ്പ്യൂട്ടിംഗ് ഇന്ഫ്രാസ്ട്രക്ചര് മേഖലയില് 70 ബില്യണ് ഡോളറിന്റെ (ഏകദേശം 5.8 ലക്ഷം കോടി രൂപ) വന് നിക്ഷേപം പൂര്ത്തിയാക്കിയതിന് പിന്നാലെയാണ് പദ്ധതിയുടെ രണ്ടാം ഘട്ടം പ്രഖ്യാപിച്ചത്. കേന്ദ്ര ഇലക്ട്രോണിക്സ്-ഐടി മന്ത്രി അശ്വിനി വൈഷ്ണവാണ് വെള്ളിയാഴ്ച ഇക്കാര്യം അറിയിച്ചത്.
എഐ സാങ്കേതികവിദ്യയുടെ ഗുണഫലങ്ങള് സാധാരണക്കാരിലേക്ക് എത്തിക്കുക എന്നതാണ് രണ്ടാം ഘട്ടത്തിന്റെ പ്രധാന ലക്ഷ്യം. നിലവിലെ എഐ മിഷന്റെ ഒന്നാം ഘട്ടം അടുത്ത അഞ്ചോ ആറോ മാസത്തിനുള്ളില് പൂര്ത്തിയാകും. ഇതിന് പിന്നാലെ കൂടുതല് സാമ്പത്തിക സഹായത്തോടെ മിഷന് 2.0 ആരംഭിക്കുമെന്ന് മന്ത്രി പറഞ്ഞു.
എഐ മോഡലുകള് വികസിപ്പിക്കുന്നതിന് ആവശ്യമായ ഗ്രാഫിക് പ്രോസസിംഗ് യൂണിറ്റ് (ജിപിയു) ലഭ്യതയില് ഇന്ത്യ വലിയ മുന്നേറ്റമാണ് നടത്തിയത്. 10,000 ജിപിയു ലക്ഷ്യമിട്ട സ്ഥാനത്ത് ഇപ്പോള് 38,000 എണ്ണം വരെ എത്തിക്കാന് മിഷന് സാധിച്ചു. ഐടി മന്ത്രാലയത്തിന് കീഴിലുള്ള ‘ഇന്ത്യ എഐ’ എന്ന സ്വതന്ത്ര വിഭാഗമാണ് പദ്ധതി നടപ്പിലാക്കുന്നത്. 2024 മാര്ച്ചില് 10,371.92 കോടി രൂപയുടെ ബജറ്റോടെയാണ് ഇന്ത്യ എഐ മിഷന് തുടക്കമിട്ടത്.
ഫെബ്രുവരി 19, 20 തീയതികളില് ന്യൂഡല്ഹിയില് നടക്കുന്ന ‘എഐ ഇംപാക്ട് സമിറ്റ്’ ഈ മേഖലയിലെ നിര്ണ്ണായക ചുവടുവെപ്പാകും. എന്വിഡിയ സിഇഒ ജെന്സന് ഹുവാങ്, ക്വാല്കോം സിഇഒ ക്രിസ്റ്റ്യാനോ ആമണ്, അഡോബ് സിഇഒ ശാന്തനു നാരായണ് തുടങ്ങിയ ആഗോള സാങ്കേതിക പ്രമുഖര് ഉച്ചകോടിയില് പങ്കെടുക്കും. ഓപ്പണ് എഐ പ്രതിനിധികളും സമ്മേളനത്തിന്റെ ഭാഗമാകും.
SUMMARY: India is launching ‘AI Mission 2.0’ following a $70 billion infrastructure investment to democratize AI access nationwide.
