ന്യൂഡൽഹി: വനിതാ സംവരണ ബിൽ ഈ പാർലമെന്റ് സമ്മേളനത്തിൽ അവതരിപ്പിക്കാനുള്ള നീക്കവുമായി കേന്ദ്രസർക്കാർ. വനിതകൾക്ക് മൂന്നിൽ ഒന്ന് സീറ്റുകൾ സംവരണം ചെയ്യാനാണ് കേന്ദ്രം തീരുമാനിച്ചിരിക്കുന്നത്. ഇതിനായി നിലവിലുള്ള ലോക്സഭാ സീറ്റുകളുടെയും നിയമസഭ സീറ്റുകളുടെയും എണ്ണത്തിൽ 50 ശതമാനം വർധനവ് വരുത്തി വനിതാ സംവരണം ഉറപ്പാക്കാനാണ് കേന്ദ്ര നീക്കം
.പ്രതിപക്ഷം ഈ നിർദ്ദേശം അംഗീകരിക്കുകയാണെങ്കിൽ ബിൽ പാസാക്കുന്നതിനായി പാർലമെന്റ് സമ്മേളനം ഒരാഴ്ച കൂടി നീട്ടാനും സർക്കാർ തയ്യാറാണ്. ബിൽ പാസാക്കിയാൽ, ലോക്സഭാ സീറ്റുകൾ നിലവിലെ 543ൽ നിന്ന് 816 ആയി വർധിക്കും. അതായത് 273 സീറ്റുകളുടെ വർധനവ്. അതേസമയം, കേരളത്തിൽ നിലവിലുള്ള 20 ലോക്സഭാ സീറ്റുകൾ 30 ആയി ഉയരും. നിയമസഭാ സീറ്റുകളുടെ എണ്ണം 140-ൽ നിന്ന് 210 ആയും വർധിക്കും
പുതിയ സെൻസസും അതിനുശേഷമുള്ള മണ്ഡല പുനർനിർണയവും പൂർത്തിയാകാൻ കാത്തുനിൽക്കാതെ തന്നെ വനിതാ സംവരണം നടപ്പിലാക്കുന്നതിനായി പ്രതിപക്ഷ പാർട്ടികളുമായി കേന്ദ്ര സർക്കാർ ചർച്ചകൾ ആരംഭിച്ചിട്ടുണ്ട്. തിങ്കളാഴ്ച കേന്ദ്ര ആഭ്യന്തരമന്ത്രി അമിത് ഷായുടെ അധ്യക്ഷതയിൽ നടന്ന യോഗത്തിലാണ് നിർദ്ദേശങ്ങൾ മുന്നോട്ടുവച്ചത്. വരാനിരിക്കുന്ന ഉത്തർപ്രദേശ്, ഉത്തരാഖണ്ഡ് നിയമസഭാ തിരഞ്ഞെടുപ്പുകൾക്ക് മുൻപ് തന്നെ വനിതാ സംവരണം നടപ്പിലാക്കാനാണ് സർക്കാർ ലക്ഷ്യമിടുന്നത്. ഇതിനായി നടപ്പു സമ്മേളനത്തിൽ തന്നെ ഭരണഘടനാ ഭേദഗതി കൊണ്ടുവന്നേക്കും.
SUMMARY: Central government comes up with a new plan to ensure women’s reservation
